Hemserekê PYDyî Şahoz Hesenî dîyar kerd ke ê nê rojan de zafaneyê hêzanê sîyasî yê Başûrî de ameyî têhet û wina va: “Beno ke no proses de kongreya neteweyî nêeşko bêro viraştene. Labelê qe nêbo Kurdî eşkenî tayê pêvînayîşan bikerî û pîya hereket bikerî. Kurdî çiqas bibî yewe, hende qezenç kenî.”

 

BERHEM LETÎF / SILÊMANÎ/ROJNEWS

Temsîlkarê partîyê sîyasî ke Îdareyê Xoserîya Demokratîke yê Vakur û Rojhelatê Sûrîye de ca gênî, 13ê Hezîrane de Başûr de tayê partîyanê sîyasîyan reyde pêvînayîşî viraştî. Babete ser o Hemserekê Partîya Yewîya Demokratîke (PYD) Şahoz Hesenî qisey kerd û melumat da.

Hesenî da zanayene ke ê ge-ge seba ke averşîyayîşan ser o bivinderî, yenî têhet û wina va: “Ma kombîyayîşê xo yo peyên de qerar girewt ke rewşa herême partîyanê sîyasîyan yê parçeyanê bînan de pare bikerî. Na çarçewa de ma tayê pêvînayîşî kerdî û nê pêvînayîşan de babeta ma ya esasî yewîya neteweyî bî. Ma pêvînayîşan de dî ke tewirê zafaneyê kurdan yewîye ser o yo.”

Hesenî qiseykerdişê xo de qala muhîmîya wextê nê pêvînayîşan kerde û wina va: “Rojawan de vera DAÎŞî de serkewtişêko gird ame qezençkerdene û nika ra pey rojeva ma de dagîrkerîya dewleta tirkî esta. No het de munaqeşeyê ma estî. Reyna Vakurê Kurdîstanî de Kurdan nîşan da ke aktoro sereke ê yî. Zîndanan de xoverdayîşêko tarîxî ame cuyayene. Labelê Tirkîya vera Kurdan de hêrişanê xo domnena. Ma zî prosesêko winasî de senî eşkenî yewîya xo awan bikerî ser o munaqeşe kerd.”

Heme hêzî muhîmî danî ewîya neteweyî

Hesenî va ‘ma zafaneyê hêzanê sîyasî yê Başûrî de ameyî têhet’ û wina domna: “Silêmanî û Hewlêr de hêzê îmkanê înan yê pêvînayîşî çinêbi. Ma çarçewaya îmkanan de tayê partîyanê Rojhelatî de ameyî têhet. Ma Temsîlkarîya HDPyî yê Hewlêrî zî zîyaret kerd. Heme hêzan muhîmî da yewîya neteweyî. Beno ke no proses de kongreya neteweyî nêeşko bêro viraştene. Labelê qe nêbo Kurdî eşkenî tayê pêvînayîşan bikerî û pîya hereket bikerî. Têkilîya tayê hêzan bi hêzanê herêmkîyan de esta. Labelê ganî têkilîyê ma nêbî sebeb ke ma zulme yewbînan bikerî. Ma no het de derga derg tayê munaqeşeyî kerdî.”

Rewşa ke esta nîna qebulkerdene

Hesenî va ‘eke hêzê sîyasî nizdîyê yewbînan de nêvinderî, o wext çar parçeyê Kurdîstanî zî binê tehluke de benî’ û wina dewam kerd: “Seba nêyî îmkanî ameyî xelqkerdene. Êdî ti kes nêeşkeno vajo ke çew goş nêdano Kurdan. Estena Kurdan ame îspatkerdene. Seba çareserîya problemê Kurdan, hewldayîşê cîddî lazim î. Beno ke pratîk de tayê xebatî hêdî şêrî zî ganî ma seba leznayîşê xebatan mîyanê hewldayîşan de bibî. Rewşa ke esta nîna qebulkerdene.”

Kurdî bibî yew, eşkenî vera dagîrkerîye de bivinderî

Hesenî qala muhîmîya yewbîyayîşê heme Kurdan kerde û wina va: “Mabênê hetanê sîyasîyan de erjnayîşêko ortax esto û no zaf muhîm o. Pêroyîya Kurdan yewîye wazena. Cok ra ganî hetê kulturkî û rêxistinbîyayîşî de xebatê cîddî bêrî kerdene. Ganî ma bi hawayo parçebîyaye nê, seba ke zemînê awankerdişê yewîye ronî, bixebetyî. Ganî herkes qerarê hemparî bigîro. Ma çarçewaya pawitişê qezencanê Rojawanî nizdî benî û muhîmî danî. Birêz Kosret Resûlî pêvînayîşan de vatbi ‘Eke Kurdî bi hawayo parçebîyaye bibî, o wext vera dişmenan de zeyîf benî, labelê eke bibî yewe eşkenî netîce bigîrî’. Kurdî çiqas bibî yewe, hende qezenç kenî û eşkenî vera dagîrkerîye de bivinderî.”