Qezaya Mêrdîn Nisebîn de abluqayê dewlet roja 11. de yo. Verra terorê dewlet xoverdayişê şarî rameno. Polîsê ke waştê dekewê taxan rê xoverdayoxan destûr nêda.
Nisebîn de 'qedexe'yê dewlet 11. roj de rameno. Sereştişê çeteyanê dewlet benê pîl. Heta nika netîceyê terorê dewlet de 8 welatijî amey qetilkerdin. Bi desana dirbetinî estê. Taxanê Abdulkadirpaşa, Yenişehir, Fırat û Dicle de aw û ceyran birniya yê. Polîsê ke hewl day dekewê nê taxan hetê şarî peyser amey eştin. Raya Îpek, meydanê Newroz, ceddeyê nêweşxane û Çagdaş de wesayîtê zirxî ameyê bi ca kerdin. Verra sereştişan Nisêbînijî serreyê xo çewt nêkenê. Şar kuçeyan de nobed gêno û nûmayişan virazeno.
Parlamenterê HDP serva Nisêbîn grevê veyşanî de yê
Heta bîn ra nûmayişê grevê veyşanî yê parlamenteranê sûk Gulser Yildirim, Alî Atalan, Mîthat Sancar û Erol Dora roja 5. de rameno.
Qeza û sûkanê çormê ra serva paştdayen, Kurdistanijan verê xo day hetê Nisêbîn. Bi seyan welatijî Amed û qezayanê Mêrdîn Qoser, Dêrik, Şemrex, Stewrê ra şî Nisêbîn resyay meydanê grevê veyşanî yê parlamenteran. Xeylê welatijî zî dekewtişê qeza de amey manîkerdin.
Zerreyê ci de şaredar û heyetê DBP ra piya, şêligî waşt abluqeya polîsan bişikînê û dekewê qeza.
Çeteyanê AKP ebi bombeyanê gaz eştî şêligî ser. Netîceyê sereştiş de hemseroka DBP Emîne Ayna û parlamenterê Mêrdîn Mîthat Sancar hewadiyay nêweşxane. Demê sereştiş de xeylê kes dirbetin bî û girotiyay bin çiman. Çeteyanê AKP herzewbîn dest nayro dîmenanê muxabîranê JİNHA, DİHA, İMC û Rojnameyê Cumhuriyet ser.
Gever nobedê xoverdayen de yo
Jew cayo bîn, o ke hiqûqa dewlet nêravêrena Gever o. Qezaya Colemerg Gever de 'qedexe'yê vetişê teber yê dewlet roja 4. de yo. Rexmê qedexe welatijî kuçeyan canêverdanê û taxan de şew û roj nobed gênê.
Êrişê polîsan yê verra taxa Cumhuriyet ramenê. Ta taxî de şar zê Mala Gel de barîkat rona. Herzewbîn taxanê Orman, Qişleya kehan, Yeşildere û Mezarlık de zî rexmê hewayê serdîn nobed gênê. Taxanê Cumhuriyet û Orman de cenî xoverdayiş rê rayverîn kenê. Cenî ebi tilîlî, bi slogan û vengvetin destûr nêdanê polîs dekewo taxan.
Kesê ke amey kişten defin bî
Heta bîn ra didi gencê bi nameyê Naîm Noyan û Mehmet Reşît Arıcı, yê ke hetê çeteyanê AKP amey kişten hetê des hezaran kesan defin bî. Cenazeyê Noyan, şehîtgehê Orman de, yê Arici zî mezeleyê taxa Mezarlik de amey definkerdin. Merasîmê cenaze de verra qetlîamanê dewlet yê Erdoğan'î rê hêrs û nêrazîbiyen damisniyayî. Hemserokê meclîsê şar yê Gever'î Şerafettîn Dede merasîm de qisey kerd û vengê berzkerdişê xoverdayin da. Parlamenterê Colemerg Nîhat Akdogan'î zî ard ziwan ke, şarî qerarê îdareyê cewherî da yo.
Badê merasîmê cenaze, welatijî ageyray taxanê xo û destpa nobed girotiş kerdî. Verra hêrişanê bombeyanê gaz yê polîsan şarî ebi kemer-sîyan cewab day. Xeza de tengezarî dewam kena.
Farqîn de homara kesê ke amey kişten vejya 9 kesan
Heta bîn ra xoverdayişê qezaya Amed Farqîn de homara kesê ke weşiya xo kerdî vinî bî 9. Vejya teber ke 'qedexe'yê 12 rojan de welatijê 78 serre, bi nameyê Latîf Nangîr'î zî weşiya xo kerdo vinî. Ceniya Nangîr'î Behiye Nangîr'î aşkere kerd ke merdeyê ay rîwalê vengê bombeyan weşiya xo kerd vinî. Nangîr'î wina behsa hadîse kerd: Keyeyê ma day ver guleyan, dêsê keyeya ma rijayay. Merdeyê mi rîwalê vengê bombeyan nêrehat bi. Mi waşt ey berê nêweşxane. La Kaniya Dergê de bombe eştî nezdiyê ma. Netîceyê nayî de merdeyê mi kewt erd. Ma hewada nêweşxane. La doxtoran va ke, mezgê ey derb werdo, cok ra weşiya xo kerd vinî. Bi Nangîr'î ra piya, homara kesê ke weşiya xo kerdî vinî vejya 9'î.
Lîce de mezelî û camî bombevaran kerdî
Qezayanê Amed Lîce û Hênî de, 25 taxan de 'qedexe' yê vetişê teber îlan bi. Badê no 'qedexe' hezarî ra vêşî eskerî vejyay operasyon. Esker û tîmanê teybet erd û esmanî ra hêrişê şehîtgehê Şehît Harûn kerdî. Netîceyê bombevaran de mezeleyî xesarê gird dî. Herzewbîn camî, salonê îstirehat, hênî û tabela şikiyay.
NAVENDÊ XEBERAN
“Wayrê welatê xo bivejyê”
Înisiyatîfê Şarî yê Kurdistan veng da pêrokîn şarê Kurd û aşkere kerd ke, gerek pêrokîn sûk, sûkek, dew û taxî, verra terora dewlet cewab bidê. Û ard ziwan ke, gune meterîsê xoverdayin vilayê pêrokîn welat bibê.
Planê îşgalkerdinê Kurdistan estê
Înisiyatîfî vist vîrî ke, lingê planê qetlîmanê AKP yê newî Nisêbîn û Gever o. Damûstayîn de vajiya ke, Kurdistan de bi nameyê demokrasî, ciwyana newî çi esto, wazenê bişikînê û niya dewam kerd: Artêşê kiştox yê DAİŞ kirêşiya Bakûrê Kurdistan. Nê hêrişî zey jû stratejî rafînayê verniya kiştoxan. Planê newede ra îşgalkerdinê Kurdistanê.
Peyniya faşîzma AKP biyarime
Înisiyatîfî va, senî ke xoverdayişî Kobanê de, Grê Spî de, Cizîr, Sûr û Farqîn de serkewt se, ewro do Nisêbîn, Gever û cayanê bîn de zî serkewo. Dewamiya damûstayin de wina-niya vajiya: Hewceyinê xo tenzîmkerdişê hewna gird û rind esto. Her sûk, dew û mehleyê Kurdistan, kotî ra êriş yeno se, verra ay kişta xo ra cewab bidê. Meterîs-mewziyê xoverdayiş gune vilayê her ca yê Kurdistan bibo. Girdîna xoverdayişê ma do peyniya planê operasyon û faşîzma AKP biyaro. Hemver xoverdayişê ma gune artêşa kiştox yê AKP cesaret nêkero ke, dekewo qadanê ma yê azad û destê xo derg bikero.
Ciwyana xoser, demokratîk û azad
Înisiyatîfî vist vîrî ke tercixê xorayverîn yê Gever, Sûr, Farqîn û Nisêbîn, tercixê pêrokîn Kurdistan o. Gune pêrokîn cayî çormeyê tercixê ciwyana xoser, demokratîk û azad de bibê xelek. Înisiyatîfî veng da genc, cenî û pêrokîn şarî ke xoverdayiş vilayê pêrokîn cayan bikerê, wayrê welatê xo bivejyê.