Serê şodirî yo. Surade serdine yêna koyê Şengalî de. Serdêşte de. Ma cemedîme. Ma cemedîme la ne zaf. Heta ara bibo şîrîn sura serdine êna peyê cû tîje rind a rind dana Serdêşte ra pêro gandara kena germ. Can êno Serdêşte. Serdêşte bena şên.
Ez der û dorê holika ke ma sey mektebî kar anîme de tayê feteliya peyê cû mi verê xo da holika ke ma sey kulinde gurênenîme. Çend deqa raye ra şîya, rastê Osê ameya. Osê qampa Newroze ra, yanê Rojawa ra ameyênê. Heyecanode weş ez gureta. Mi bêriya Rojawa kerdbî û rewşa Rojawa merex kerdênê. Fekê mi goşanê mi de mi selam da Osê yî. Şengalijî kî nameya kenê kilm. Verê mi rewşa ey perskerde û peye cû rewşa Rojawayî.
Çend embazê bînî amayî dora ma. Babete şîye ser mamosteyanê qampa Newroze ser. Mi bi merex pers kerd:
-Rewşa mamosteya senên a? Mektebî kerdî ya, ya nê?
Cewabê Osê yo ke ma keyfweş kerdîme no bî:
-Ya ya.
Seba ke ma hurguliya nasbikerîme mi reyna pers kerd:
-Ma çend mamosteyî mendê?
Cewabode weş o bîn ame:
-Nika vîst mamosteyî ser karê. Çend mamosteyî şîyî Kurdistanê la ma cayê înan de mamosteyanê ke verê perwerde dîbî erkdar kerdî.
Qamp, mektebî, domanî, mamosteyî pêro vîra mi ra şî. Mezgê mi û zerrîya mi çekuya kurdîstanî de aleqyayî û mendî. Ez tayê hînî menda peyê cû ama re bi xo û mi pers kerd:
-To va şî Kurdistanî?
Osê xo ra zaf bawer va:
-Heya şî Kurdîstanî.
Mi reyna pers kerd:
-Kurdistan kotî yo?
Ez zanena Osê qala kotî keno. Rojawa kî ge-ge ez rastê nê çîyî ameyabî la şenik sey Şengalî nê. Şengal de ez zaf rastê ci ameya. Ez bawera famkerdîşê komelî de no têresayîş virazîyo. Osê mat mende mi de nîyada û na rey ey pers kerd.
-Se yanê? Kurdistan kotî yo senê perso?
Na meseleyê mi rê bîya derd. Ez gereke zereyê xo cayêk de tal kerî. Mi pers domna:
-Senê perso çiko? Yanê tawo (wexto) ke ti vana Kurdistan ti qala kotî kena?
Osêyî haaaa yo de derg ant û va:
-Mi newe fam kerd. Ya ez sebikerî ma hînî musayîme. Ma Başurê Kurdistanî ra vame Kurdistan. Ti rast vana uca Başûrê Kurdistanî yo, Kurdistan nîyo.
Bi nê têresayîşî ez kî têresena ke çira ser hîrê perçeyanê bînan hende bazarî virazîyena. Siyasetê perçe bike raye ra bere zerrîya mi de reyna xo bi derbade xedare dano hîskerdene û no vateyê verêna: Kermê dare ne dare bi xo de bo dare nêginena war o.