Eyro merdim ewneno rewşa hukimatê AKPe û serekkomarî ra merdim şaş û heyirî maneno. Se vano; bi hezaran merdim vatişê yine raşt vîneno. Çapemenî girewto destê xo. Çi wajo se, êy nûsenê, êy vanê. Zanê ewna nîyaz î. Wextêko zehf nizdî de zûrê yine vejyenê zî. Zey diyalog û muzakerey bi rêxistinê PKK û bi birêz OCALANî dir o, Oslo de, Îmralî de. Mutabaqatê Saraya Dolmabaxçe. Nêy pêro temamê qada civakî pê zano, diyo û vînawo. Verê çimande yo. La ame înkarkerdiş. Çapemenî nizdî ra nê, hukimat û serekkomar senî biwazo ewna nûştêy û nuşnenêy. Bi milyonan merdimê yinan zî ewna bawer kerd û kenêy. Zey wextê buyeranê Gezî Stenbol de, vat; ‘zereyê camî de reqî şimita. Meleyê camîyî ra bipersêy?’ Meleyê camîyî zî vat; ‘ez alim a. Alimî zûrî nêkenêy. Zulmê polîsan ra remay ey semedî ra bi sitiryê ra amey zereyê camîyî.’ û pey ra zî vat; ‘ez melayî ra bawer nêkena.’ Ne fedî kenêy ne zî şermayenêy. Raynê vat; ‘da wo cenîya ma ya sere girote ra. Qeydîy estê.’ Ewna qemeraya ke ewca antiş kerdo. Çîyeko wina çîno. Vat; ‘ez vatiş ra bawer kena. Ma hete bajarî xerepnêy. 

Merdimi qetilkerdê.’ Avahiyê dîrokî bi tanq û topan ricnêy, xerepnay. Ma hetî de vatişeke verînan esta: “Gama awa riyê merdimî biteqo merdim êşkeno heme xerabîy bikero.” Ruşwet wenêy fedî nêkenêy. Zûran kenêy fedî nêkenêy. Dizdî kenêy heram nêvînenêy! Vano min Obamayî ra telefon kerd. Êy qiseye ke vanêy, verpersê ABD awêko bîne vanêy. Vatişêkê şarî esta: “Ti çi benê bibi la mebe rezîl.”Dîrokî de tay meseley estêy arenê merdimîy vîrîy. Raştîy merdim gava goştarey meselan kerdêy merdimî rê zey xeyaleke ameyê. Merdimî vatê ecêb qey ewna beno. Yan zî beno ke ewna merdimîy bibîyêy. La eyro verê çiman de duşt temamê qadê civakî de virazyay.Mesêlê dirokî de virazya yew cira vano: “Elî Kufa de maneno. Muavîye zî Şamî de yo.” Beyntarê yine baş nîyo. Rojêk merdime ko kufarij bi deveyê xo ya “nerî” barê xo areno Şam. Yew şamij wayirê deveyê “nerî” ra vano na deveya “maya” min a. Deveya maya min bidê min. Wayirê deveyê nerî vano ti se vanê? No deveyê min a. Ez kufarij a û Kufareyî ra yena. Deveya zî ho ti vînen maya nê neri ya”. Nê vano merdimo şamij! Na deveya maye, yê min a! Ewca de danê pêro. Yew bînîy benêy dadgeh. Verê dadgehe de bi hezaran merdimîy şamijîy resenê pê. Merdimo kufarij qadî ra vano; ‘No merdim deveyê min ê nerî ra vano na deveya maya min a. Ka na senîn bena!’ Qadî vano cemaetî ra ma bipersim. Mêrdimo kufarij qebûl keno. Qadî vano şima se vanêy? Şareko amewo ewca pêrîy teydir vanêy na deveya maya ma zanê ku yê merdime şamijî ya. Muaviye vendeno wayirê deveyî. Vano biewnêy ezî zana ti zî zanî no deveyê nerî yo û deveyê to wo. La şo Elî ra vaje bi hezaran merdim deveyê nerî ra vano na deveya maya înan a. Wa naye bizano, o bi gorê naye lingê xo berzo. 

Rewşa Tirkîya ewna ya! 


Nesîp GULTEKÎN