Endamê Komîteya Bawerî û Şaran ya KCKyî Cîhan Erenî derheqê Yewîya Neteweyî ya Kurd de qisey kerd û vînayîşê xo ard ziwan.
Erenî qiseykerdişê xo de bale ant demokratîkbîyayîşê kurdan ser û wina va: “Demokratîkbîyayîşê kurdan yeno manaya demokratîkbîyayîşê Rojhelato Mîyanênî. Seba ke kurdî bişînbî xo bi xo îdareyê xo bikerî, ganî bibî wayîrê statuyêk. Seba ke kurdan yewîya xo awan nêkerdî, bê statu, nasname, ziwan mendî û raştê qetlîyam, surgin û talanî ameyî. Labelê ewro kurdî Rojhelato Mîyanên de demokrasî rê rayberî kenî. Cok ra ganî şarî bi demokrasî xo rêxistine bikerî. Seba nêyî zî ganî ma zîhnîyeto parçeker ra xo rizgar bikerî û Kongreya Neteweyî de ca bigîrî.”
Erenî dewamê qiseykerdişê xo de hayr ant polîtîkayanê PDK ser û wina va: “Welatê ereban, Îran û tirkî heta nika senî kerdî, Kurdistan de zî PDK û bitaybetî keyeyê Barzanîyî wina kena. PDK sey kurdanê seserra 20. de hereket keno. Ganî hêzê kurdan goreyê seserra 20. hereket nêkerî, xo rêxistine bikerî û statuyê xo qezenç bikerî.”
Komxebate hêvî dana
Endamê Komîteya Bawerî û Şaran ya KCKyî Cîhan Erenî qala muhîmîya komxebata ke Silêmanî de virazîyaye kerd û wina va: “Hêzê ke komxebate de ca girewtî, yê ke bedilîyayîşî wazenî yî. Ganî ma bi hawayo baş bizanî ke ma çira heta nika Rojhelato Mîyanên de vînî kerdo. Kurdê ke bi hawayo keye, eşîr, êl û sewbîna hereket kerdî, vînî kerdî. Bitaybetî burokratê ke dormeyê îqtîdaranê tirkan de ca girewtî, herinda ke menfîetê şarê xo bifikiryî, tena yê xo fikirîyayî. Dagîrkerî nêwazenî Kurdistan bibo wayîrê statuyêk.”
Goreyê seserra 21.
Erenî peynîya qiseykerdişê xo de va ‘eke kurdî hetê leşkerî, sîyasî, ekonomîk û dîplomatîkî de yewîya xo awan bikerî, o wext do bibî wayîrê statuyêk’ û wina qedêna: “Ewro Rojhelato Mîyanên de Şerê Cîhanî yê 3. Esto û no şer şerêko serd nîyo. Ma donemê netewdewletan de nîyî. Kongreya Neteweyî rêxistinîya kurdan a seserra 21. nîşan dana. Ewro problemê kurdî Rojhelato Mîyanên de problemêko esasî yo, eke kurdî bibî yewe do heme Rojhelato Mîyanên de problemî çareser bibî.“
ANF/BEHDÎNAN