Hardê Êzîdxan ke 3ê Tebaxe 2014î de bi qirkerdişeke gird ra rî bi rî mend û nika reyna hedefê hêrîşanê qilêrîn de yo. Komê bi tifingî ke girêdayê PDK yê û hetê Tirkîye amey perwerde kerdiş vizêr hêrîşê herema Xanesor ê Şengal kerdî. Quwetanê YBŞ-YJŞ zî bi xoverdayîşeke gird cewab da komanê bi çekî û bi desan cenazeyê komanê PDK hewadîyay nêweşxaneyan.
Enqera de plan bi
Şengal o ke hona dirbetê ci yê qirkerdişê 3ê Tebaxe akerde yê, nika reyna bi talokeyê qirkerdişî ra rî bi rî yo. La na qorî hêrişî çarçoveyê konseptekê xîyanetî de benê. Serokê PDK Mesût Barzanî 26ê Sibate de şi Tirkîye û bi sermîyananê dewlet ra çend pêdîyayinî viraşt. Hêrîşê vera Şengal ke vizêr ra destpa kerdî zî leteyekê na pîyakarîya PDK-AKP û konseptê newî ya. Goreyê îdiayan hêrişê vera Şengal zî Enqere de ameyo plankerdiş.
Komê bi çekdarî yê bi nameyê ‘Pêşmergeyê Rojava’, ‘yewîye Zêrevan’ (quwetê taybet yê PDK) ke girêdayê PDK yê û hetê dewleta Tirk amey perwerde kerdiş vizêr sodir saet 06:00 ra tepya herêma Sihêla ra ver bi Xanesor a Şengal kewtî hereket. Nê koman bi tanq û tifinganê giran hêrişê cayanê sivîlan yê Êzîdxanî kerdî. Mîyanê nê koman de, komeke bi nameyê FOC ke qetlîama Şengalî de ca girewt zî esta.
Şar xo paweno
Komê çete ke waştî bikewê heremanê ke bin qontrolê YBŞ de yê raştê xoverdayîşê quwetanê YBŞ-YJŞ û quwetanê asayîşî amey. Tenya YBŞ-YJŞ nê, ronişteyê Xanesor zî tifing hewaday û destpa xoverdayişî kerdî. Cinî-camêrd, genc û kalê Êzidxan ke no 3 serrî yo hewl danê ke dirbetanê xo derman bikerê, vera hêrîşanê komanê PDK, YBŞ-YJŞ het de destpa xoverdayişî kerdî.
Êzidîye ke herema Serdeşt de xêman (kon) de ciwîyenê hêrişan rê nêrazîbîyayîş damûsna û tayanê ci zî çek girewtî û tewrê xoverdayîşî bî. La PDK şîyayîş û ameyîşê şarî manî kerd.
Çeteyê DAIŞ zî mîyan de yê
Goreyê zonayîşanê ke herem ra amey mîyanê komanê bi tifingî de, kesê ke bi tirkî û erebî zî qisey kenê zî estê. Komanê bi çekî yê PDK ra 4ê ci hetê YBŞ bi saxî amey tepiştiş. Dima ra vejya werte ke nê kesan ra 2ê ci endamê DAIŞ ê.
Pirodayîşê mavêna quwetanê azadîya Şengal û komanê PDK de bi desan kesî kişîyay û cenazeyê bi desan komanê PDK hewadîyay nêweşxaneyê Sinûne. Herzewbîn 80 pêşmergeyê ke nêwaştî na îxaneta PDK de rol kaybikerê û tewrê şerî bibê, hetê rêxistina îstîxbarat yê PDK Parastin ameyê remnayîş. Nê pêşmergeyan ra xeber nîna girewtiş û rîskê kiştişî esto.
3 rojnamegerî kerdî dirbetin
Hêrîşkaran rojnamegeran zî hedef girotî û 3ê ci kerdî dirbetin. Rojnameger Nûjîyan Erhan ke xeber taqîp kerd raştê sûîkasta komanê PDK amê. Erhan ke raştê sûîkast amê giran bî dirbetin û hewadîya nêweşxane. Goreyê zonayişan Erhan emelyat bî û Beşê Lezgîn de manena. Erhan ra pîya kameramanê ci zî bi senik bi dirbetin.
Herzewbîn 2 mûxabîrê ÇIRA TV yê binameyê Hadî Îlyas û Îzzet Îsmet zî bî dirbetin û hewadîyay nêweşxane.
NAVENDÊ XEBERAN