* Na hîkaye semedê vîrardişê şehîd Erdal Arif Îsyanî (Yilmaz Aydin) ameya nuştene.   


Vewre ca ra ca yew metre, ca ra ca di metre ya. Vewre mîyan de hîrê sey qerşûnî çante de, çante zî paşta ci de yo. Winî vazdano ke ti vanî qey hema do bireso Kobra. BKC (bîkîsî) girewto dest xo, kewto pey helîkopterê lejî. 

Ez do şima rê tayê qala Erdalî bikera. Erdal çêrmûgij o. Ewropa de hereketê serbestî şinasneno. Keweno têkoşînî mîyan. Ewropa de xebate keno. Rêxistina gencan mîyan de gureyeno. Badê cû yeno welat. Kurdîstanî de kordînasyonê rêxistina gencan de cayê xo gêno. Pey ra zî vano:

– Êdî bes o, ganî ez şorî mîyanê hêzanê gerîla û na fin sey gerîlayan lej bikerî.


Erdal zana bî

Ma yewbînî hêzanê gerîla mîyan de şinasna. Şikefta Birîndaran, Herêma Zapî de. O zimistan kênek û lajekî şikeft de perwerde dî. Semedo ke embaz Erdal zana bî, her kesî ra vêşî kewt mîyanê perwerde û galegal kerd. Ewropa ra heta Şikefta Birîndaran praktîk kerd û hem xo perwerde kerd hem zî perwerde da embazanê xo. Coka ameyîşê mîyanê gerîla ra pey bî fermandarê tîmî. 

 Yew girdan (tabur) embazî mîyan de vindertişê ci yo cuyî û rêxistinî cîya bî. Coka bi no vindertişê xo bî sînayeyê pêroyê embazanê xo.


Her kes rext û qeleşê xo pak keno

Perwerde giran-giran ver bi peynî şîyêne. Xeberî yenê hesnayene ke dişmen do operasyon virazo. Erdalî xeylê rey vat:

– Wa bêrê, ê vînenê peynîye senî beno.Vera dişmenî zereyê xo de zaf kîndar bî. Pêro embazî kelecanî bîbî. 

Her kes rext û qeleşê (kalaşnîkofê) xo pak keno. Bi rûnê jeneratorî qeleşê xo bereqneno. Her kes tewr kêmî di bombayanê urisan rextê xo ra aleqneno. Hîna nêbîbî şewdir, dişmenî bi teyara bombarduman kerd. Demê dinya roşna bî, dişmen geme ra ame. Embazan dame rona û da piro. Hîna destpêk de dişmenî derba girde werde. 

Erdal, Cahîd û Agirî şî Girrê Karkeran. Vernî de Cahîd, peyê ci de Erdal, Erdalî ra pey zî Agirî kewtêne pîyare (patika) ser û vazdayî. Yew vakurij, yew rojawanij, yewo bîn zî rojhelatij o; qandê erdê Kurdistanî, namûs û şerefê ci şonê ke lej bikerê. A roje û a şewe her hîrê embazî vewre mîyan de mendî. Roja bîne hewa akerde nêbî. Heta vîsteya peynî zî dişmen nêameyo dîyene. La embazê ke dorme der ê, zanayîş da înan ke, tayê dişmen ameyo kewto Girdê Karkeran. Coka her hîrê embazî kewtî mîyan lewîyayêne.


Yew, di, hîrê, Erdal bî dirbetin

Hewa giran-giran akerd. Hewr û mij vila bî, her hîrê embazan hîna dişmen nêdîyo. A vîste de di helîkopterê lejî ameyî. A sernî ra heta na sernîya Girdê Karkeran şinê û yenê. Xora gird zî derg û hîra yo. Şîyayîş û ameyîşê her di helîkopteran ra pîya Erdal zî mîyan vewre de şono û yeno. Bi BKC ya xo qerşûnan çekeno ci. Peroj ra pey dişmeno ke amebî, girdî ser asayêne. Nê her hîrê embazan zî hêriş kerdî ser. Sernî de Agirî verê xo da meterîsê dişmenî û hêriş kerd. Heta resa mesafe, bomba bi bomba çekero meterîsê dişmenî la ey ra ver dişmenî suîkast kerd. Agirî şehîd kewt. Dişmenî zî dî ke nêşêno xo meterîs de bipawo, terna û şî.

Êyê ke hêriş kenê, na fin Erdal û Cahîd ê. Erdalî BKC na ser kemere, şerîtê ci raşt kerd. Cahîdî cehd kerd ke tayê şiro bi vernî, Erdalî dest bi eştena qerşûnan kerd. O meterîso ke Erdal qerşûnan çekeno ci, qet vengê xo nêkerd û cewabê Erdalî zî nêda. Kîşta nê meterîsî de meterîsê bînî estê ke xo rind nimito. Nê meterîsî ra eskeran qerşûnan çekerd Erdalî. Erdal zî hende bi wêrek lej keno, qet qama xo çewt nêkeno. Xora BKC kemere ser o ya. Coka sere û qama ci rind asena. No vindertiş zî dişmenî rê bî firsend ke asanî nîşan bigîro û qerşûn biteqno. Yew, di, hîrê, sernî de Erdal bî dirbetin, la zêde nêcuya. Gonîya ci vewreya sipîye sûr kerde. BKCya ci na vîste de bêwahar mende.


Lejê Zapî bî destan, deyîr û ...

Cahîdî, wexto ke dî BKCya Erdalî nêxebitîyena, cayê xo de vindet û peyê xo ra ewna. Erdal verê kemere de ginayo war, ser kîşta raşte de vindeto. Sêneyê ci akerde yo. Rîyê ci ver bi asmên o. Anika cayo ke Erdal ci ra ewneno, keskûsûre vejîyaya. Hewt renganê tewr xasekan rîyê xo çarnayo Erdalî ser o. 

Cahîd nêagêra, peyser game nêeşte. Şahadet qandê serkewtişî yo. Cahîdî ge-ge qerşûn teqna, ge-ge zî xo eşt vewre mîyan. Dinya ne şew ne roj a. Eskerê ke meterîs der o, nîşan girewt û qerşûn teqna, o qerşûn zî ame gina çareyê Cahîdî ro. Cahîdî qet nale-nal nêkerd, verê xo nêaçarna pey. Hetê bîyayîşê fîzîkî ra cuya ci peynî bî. Hetê manewî ra zî hêz da embazan, şaran û merdimîye.

Badê şehîdbîyayîşê nê hîrê qehremanan, qefle bi qefle gerîla ameyî Girê Karkeran ser. Êdî şehîdî nêameyî dayene. Gerîlayan dişmen qewirna. Vewra ke Girê Karkeran ser o ya, bi gonîya nê şehîdan sûr bî. 

Dişmen seba dagîrkerdişê başûrê Kurdîstanî ame, la warway rema şî. Lejê Zapî bî destan, deyîr û roman.

* Dewleta Tirk 21ê Sibate 2008 de vera Zap operasyonê erdî viraşt. Netîceyê pirodayîşanê 9 rojan artêşa tirk vindîbîyayîşê girdî day û quwetanê xo peyser ant.