Naye ser ro rêyêna bi înîsîyatîfê Alan Dilpakî Berlîn de “Komika zon û pedegojî“ dest bi karê xo kerd. O taw armancê “komike“ materîyalî tenya bi Kirmanckî û bi Kurmanckî amade kerdene bî. Yanê dizonkî nê bî.

Armancê ma ê bî ke; 

1- Domanî hetê ra kesîtîya xo ya şarkî, zonê xo, kulturê xo bimusê û bi nînan bibê pîl. 

2- Domanî qedr û qîmetê der û dorê xo bizanê, resorsanê der û dorê xo bişinasnê înan bi zanayiş bixebetnê û seba gererasîyonanê pêyênan biparezne. 

3- Domanî kesîtîyêde demokratîk û humaniste ava bikerê, verhukmna ra azad, duştê bawarîyanê bînan de û duştê şenikşaran de wayirê torans bê.

Seba naye kî metodê ke amêne xebetnayene kî gere angoreyê nê armancan biyamêne weçînitene. Yanê nê materîyalî mîyan de sîmbolê şîdetî, sîmbolê verhukman, sîmbolê talan kerdena der û dorî re ca çînê bî.

Na komike binê îdareyê A. Dilpakî de bi nê armancan û metodan dest bi amade kerdena materîyalan kerd.

Her çiqas ke bi Kurmanckî “Xwendin ronahî ye“, “Binêre! Binivîsîne! Birengîne!”, “Pirtuka wêneyan bi ABC Kurmancî” û bi Kirmanckî “Wendene roştî ya”, “Nîyade! Binivisne! Birengne!”, Pirtukêwenêyan bi ABC Kirmancki” pîya amayî amade kerdene û seba çapkerdene pîya Enstîtuya Kurdî Îstanbolî re amayî ruşnayene kî, sera 1993 de tenya pirtukê Kurmanckî/Kirdaskî hetê Weşanên Enstîtuya Kurdî ra amayî weşannayene. 

Lê gelê munaqaşayan û îtîrazan ra dima sera 1996 de pirtukê Kirmanckî “Wendene roştî ya”, “Nîyade! Binivisne! Birengne!”, Pirtukêwenêyan bi ABC Kirmancki” kî hetê Weşanên Reweşenî ra amayî weşannayene.

Seba ke naca tayê problemî vejîyayî, nê karîbi no qeyde dewam nêkerd. Nay tepîya tenya karê Kurmanckî amê kerdene.

Lê sera 2010î de Înstîtutê Ziwan û Kulturê Kirmancî (Zaza) –IKK- e. V.  û YEKMALe (Yekîtîya Malbatên Kurdistanê li Berlîn) rêyêna bi înîsîyatîfê heval A. Dilpakî dest bi nê karî kerd. Lê na şope gere materîyalî çerçeweyê ju projekte de hem kî dizonkî biyamêne amade kerdene.

Yanê materîyalî hem bi Kirmanckî-Almankî û hem kî Kurmanckî-Almankî biyamêne amade kerdene.

Seba naye kî projekta “Materîyalê musayişî yo dizonkî“ binê nameyê

“Wendene roştî ya“ “Xwendin ronahî ye“ “Lernen ist Licht“ amê ava kerdene û prînsîbê na projektê o wo, ke her materîyal gere hem bi Kirmanckî-Almanckî û hem kî Kurmanckî-Almankî bêro amade kerdene. Verpersîyarê na projekte kî Alan Dilpak û Lerzan Jandîl ê.

Ava kerdena na projekte de ked û emegê hevalê ma Alan Dilpakî raştîye kî bê pêm o. Bê dê na projekte nêbîyêne. Ancîya ked û emegê hevala ma îdarekerdoxa YEKMALe Günay Dariciye kî bê pêm o.

Çerçeweyê na projekta materîyalê musayişî yo dizonkî de pirtuko verên “Kermo Çimvêşan - Der gefräsiger Wurm”, “Kurmê Çavbirçî -Der gefräsiger Wurm” Gulane 2011 de vejîya. Nê herdimîn pirtukî hemrengên û hem kî seba ke domanî birengnê, sîya sipê teba ju CD’ye amayî weşannayene.

Nê pirtukî ra dimebi rêze pirtukê “Xiznaya Çekuyan- Wortschätze”, “Gencînîya peyvan- Wortschätze” 1-2 Eylule 2011 de,

pirtukê “Hewnê Şîlane - Şîlans Traum”, “Xwena Şîlanê - Şîlans Traum” Mard 2012 de,

pirtukê “Xiznaya Çekuyan- Wortschätze”, “Gencînîya peyvan- Wortschätze” 3-4 Eylule 2013 de, 

pirtukê “Çîroka beqikê Ceresunî-Die Geschichte vom mutigen Froschlein”, Gulane 2015 de,

pirtukê “Çîroka beqokê leheng- Die Geschichte vom mutigen Froschlein” Îlon 2015 de amayî weşannayene.

Karê na projekte hêna dewam keno û nika ma dest de çend pirtukê “Xiznaya çekuyan“ zê mêwe, sewze, kulînde û seba halênde domanan kî materîyalê musnayişî, yê ke ma kerde amade, est ê.


* Serekê Înstîtutê Ziwan û Kulturê Kimancî (Zaza) –ÎKK- e. V.