Mavêna 20'ê Hezîran û 3'ê Tîrmeha 2016î de, 39 dewanê Lîcê û mintiqaya çormeyê ci de qedexeyê vejyayîşê teberî ame îlankerdiş. 30'ê Hezîran de 34 kes îşkence ra amey ravêrnayen. 15 kes amey tepiştiş û welatijo binameyê Mehmet Şîrîn Kocakaya bi îşkence ame kiştiş. 

Medyaya dewlet zî îdîa kerd ke Kocakaya "faîlê hêrîşa bombeyî yo” û waşt kiştişê ci rewa bido damûsnayîş. Ser bîyayîş ra serreke ravêrd la hona zî dawa nêresa netîce. Sermîyanî hewl danê ser înfazî bigîrê. La vatişê şahîdanê bîyayîş heqîqat vetî teber. Şahîd Veysî Gokhanî pêrokîn şahîdîya xo bi waştişnameyêke pawitoxî rê ruşna. 

30'ê Hezîran de çoltarê Mehlê ya dewa Kerwas ê Licê de bi tewrbîyayîşê hezaran leşkeran operasyon ame destpêkerdiş. 34 welatijî bi behaneyê mudaxaleyê adirî kerdê, raştê îşkenceyê wehşî yê leşkeran amey. Bi sebebê no îşkenceyî welatijo binameyê Mehmet Şîrîn Kocakayayî weşîya xo kerd vinî. 

Leşkeran çormeyê keyeyê malbata birayê Mehmet Şirîn Kocakaya, Erdal Kocakayayî girotbi. Dima ra tîmê taybet ke amey herêm hêrîşê welatijan kerdî. Cinî, doman, camêrd herkesî rê îşkence kerdî. Pêrokîn welatijan erdî de ame dergkerdiş. Mehmet Şirîn Kocakaya qasê 300 metre berdî û îşkence dewam kerd. Polîsan wa û birayê Kocakaya Berfîn, Rojhat û Erdalî erdî ra kaş kerdî û day înan ro. Bi sebebê îşkence perzûyê Rojhat û Erdalî şikîyay. Dima ra pêrokîn dewijan weniştî wesayîta zirxî û berdî. 


Keyeyê Erdal Kocakaya day ver guleyan

Şahidê bîyayîş Veysî Gokhanî ard ziwan ke sifte vengê tifingan û  qîrayîşê domanan ame û wina dewam kerd: “Ma ver bi keyeyê Erdal Kocakaya şî. Keyeyê Erdalî amebi gulevornayen. Leşkeran çormeyê keye girotbi. Dewijî zî are bî. Leşkeran ez girota û berda rezê ke teberê dewî de yê. Ez eşta koma 15-20 leşkeran mîyan. Şîrîn Kocakaya zî eynî şiklî ardî û eştî mîyanê leşkeran. Leşkeran destpê îşkence kerdî.”

Gokhan’î ard ziwan ke tayî leşkeran zî bi telefonî îşkencekerdişî qeyd kerdî û wina dewam kerd: “Her çi qes mi va ‘ez dewij a domanê mi estê’ zî îşkenceyê mi kerdî. Leşkeran vatî ‘seba ma ferq nêkeno. Ganî şima bi hesanî nîrê kiştiş, ganî însan domananê şima zî bikişo.’ Dima ra Erdal Kocakaya zî ardî û îşkenceyê ma kerdî. Mi rê vatî ‘Ti xasek nîyê, ma dê to tayî xasek bikerê’ û day mi ro. Her cayê mi mîyanê gonî de mend. Şîrîn Kocakaya zî erdî de derg bibi. Dima ra waya Şîrîn Rojhat Kocakaya ardî û bi îstîsmarê zayendî ya vera aye, ma tehdît kerdî. Bi vatişanê ‘Ma şima bi rehetî nêkişenê’ ma tehdît kerdî. Dima 5 endamê POH'î amey û înan zî ma 50 metre berdî dûrî, day ma ro, ma viran kerdî, nêheqî ma rê kerdî û ma tehdît kerdî.” 


Waştî ez sûcî bigîra ser xo 

Gokhanî vist vîrî ke tîmanê taybet ey, Erdal û Rojhatî milê ci ra girotî û Şirîn Kocakaya zî 300-400 metre erdî ra kaş kerdî û berdî ver keyeyê Erdalî û derheqê wehşeta leşkeran de nê detayan da: “Jû koma leşkeran waşt ke dewijan qetil bikero. Verîya ke ma wenişnê wesayît, 5 kesan çongê mi vistî erdî, ez daya ver kameraya TSK û waştî ke ez înan ra vaja ke daristananê (birr) tiya mi veşnayo. Bi sebebo ke mi qebul nêkerdî fina îşkenceyê mi kerdî. Waştî mi bikişê. 2 leşkeran kêberê wesayît girotî û wesayît ewja ra ramitî. Bi no hawayî ez merdişî ra xelasîyaya. 


‘Rolê polîsê rind û xirab kaykerdî’

Veysî Gokhanî da zanayîş ke dima ra înan berdî Qereqolê Licê û vistî vîrî ke îşkence ewja de zî dewam kerd. Gokhanî dîyar kerd ke leşkeran gule nayo sere û pîzeyê eyî û ey tehdît kerdo û wina dewam kerd: “Rojhat Kocakaya bi hêrîşkarî berdî odeyêka ke kamera mîyan de çinêbî. 10 leşker amey zerrî û hêrîşê ma kerdî. Dima ra polîsêk tîmê taybet ame zerre û bi vatişanê “Şima se kenê. Nê welatijê sivîl ê” qîrê herkesî kerd. Dima ro polîsan fek hêrişî ra verada. Rolê polîsê rind û xirab kaykerdî.”


‘Rêçê îşkence kerdî pak’

Gokhan’î  ard ziwan ke leşkeran rêçê îşkence kerdî pake û dima ra, mi Rojhat û Erdalî vistî ambûlansî mîyan û Şîrînî zî vistî ambulanseke bînî mîyan. Leşkeran mîyanê ambulansî de zî heqaretê ma kerdî. Ma hewaday Nêweşxaneyê Gazî Yaşargîler de, beşê lezgînî. Gonîya sereyê mi û perzûyê mi vindîya. Şîrîn ge ge ser hişê xo ra şi, la hendayî rewşê ci giran nêbi.”


'Înfazekê akerdeyî yo’

Gokhanî vist vîrî ke tayî leşkeran heqaretê Serokkomar zî kerdî û qiseyanê xo wina qedêna: “Licê de pêrokîn dewijî şahîdê. Merdişê kesekê sax çiyekê asayî nîyo. Pawitox û malbat nêgirotî cayê otopsî. Înfazekê akerdeyî esto. Ez zî bi zorî xelas bîya. Polîs û leşkerê ke na jûyî ma rê rewa vînay, ez şena yew bi yeş teşhîs bikera. Nê komî kamî yê? Pey înan de kam esto? Telefonê pêrokînan estbi. Pêrokîn wehşetî qeyd kerdî. Eke telefonê leşkeranê a roje cipersayîş bikerê, do faîlî zî bivejyê werte.   

No mabên de maya Mehmet Şîrîn Kocakaya û 3 waûbirayê ci zî mîyan de derheqê 28 kesan de bi waştişê heta 32 serran cezayê hepsî dawa abîya. 7 leşkerê ke tewrê operasyon bibîy, derheqê malbata  Kocakaya de bîbî gerrekar.   


 DÎHABER/AMED