Cinîya Parlementerê HDP yê Dersim Alîcan Onlu Hayrîye Onlu bi wesayîta meqamî yê Alîcan Onlu, roja 10ê Hezîrane de wexto ke qezayê Qisle ra agêyra, noqteya qontrolî yê lejkerî de 1 saet bi kêfî vindernîya. Hayrîye Onlu herzewbîn raştê heqaretanê cendirmeyan amê. Parlementer Onlu ke keyeyê xo de bi, bado ke hedîse aşnawite, şi cayê bîyayîş. Onlu ke sebebê no muameleyî pers kerd û nêrazîbîyayîş damûsna, bi vatenanê “Ez to zey wekîl nêvînena”, ez wekîlanê HDPyij yê terorîst nêsilasnena, qanûn ez a” raştê heqaret û sûcdarkerdişê serçawişeke ame. Heqaretan ra dima derheqê Onlu de cipersayîş abîya. Alîcan Onlu no hewldayenî zey amadekarîyê tepiştişê xo hesibna. Onlu vist vîrî ke, no hedîse tenya helwestê jew lejkerî nîyo, nezdîbîyayîşê partîya ci yo.
Netîceyê helwestê qesrî yo
Parlementer Onlu da zonayen ke hedîse yo ke qewimya bi bêtewşîya jew serçawişî nîna îzahkerdiş û wina va: “Qiseyê ke serçawişî ardî zon zaf şinasîye bî. Vano “Ez to zey wekîl nêvînena, ez çîyo ke wazena kena, qanûn ez a.” No helwestê qesrî yo. Partîya ma rê vano “Partîya malum”, vano “qaşo hemserok”. Tewrê lejkerî zî netîceyê no helwestî yo. Qesr çitur nezdî bena se, amîrê mulkî yê herêmî zî winî nezdî benê. Helwestê walî zî eynî yo. Dorê protokol de HDP çin o, la ganî hetê qanûnî de bibo. Ma dawetê akerdişê jewêr protokolî zî nêkenê. Rîwalo ke yew cipersayîş zî heta nika nêame akerdiş, kesê zey serçawişî zî cesaret gênê.
Onlu hayr ant cipersayîşê hetdar yê walîye sûk ser û aşkere kerd ke, eke jew cipersayîş yeno akerden, ganî no di hetan rê bîro akerdiş.
Hadreyînê tepiştişî kenê
Onlu da zonayen ke, senî ke lejkeran qerta dasilasnayenî dî, hêrîşê ci kerdî û vatîyê “No parlamenterê HDP yo, nê terorîstîye û tifing wedarnenê”. Alîcan Onlu aşkere kerd ke bi zorî baxajê wesayît akerdîyê û nîyadayê. Helbet teba çin bi. Onlu vist vîrî ke seba tepiştişê ey behane geyrenê.
Parlementerê HDP Alîcan Onlu dîyar kerd ke bi aşman o eynî rayîrî ra vîyarenê. Onlu ard ziwan ke verîya coy zî tayî hedîseyî qewimyay û wina va: “Jew vano ravêre, o bîn vano ez qetî destûr nêdana. Mîyanê artêş û emnîyetî de jew ekîbo ke girêdayê qesr o esto. Ewja de 20 lejkerî estbî û tewrê her jewêr î ciya bi.”
Onlu da zonayen ke o do derheqê walî û serçawişî de serpirodayîşê gerre bikero.
Ortaxê derbe yê
Heto bîn ra Serokwekîlê Koma HDP Ahmet Yildirimî zî hêrîşê hemverê malbata Onlu rê nêrazîbîyayîş damûsna û aşkere kerd ke, yê ke pey çawişî de vinderê, pey 15ê Tîrmehî de vindenê.
Yaldirim ke meclîsî de kombîyayîşê çapemenî viraşt, lejkerê ke heqaretê Alîcan Onlu kerdî rê reaksîyonê wişt damûsna û va, “Rixmê faşîzmî ma dê sîyasetî ra fek nêveradê. Serokwekîlê Koma Yildirimî vist vîrî ke derheqê serçawişo ke heqaret kerd ke cipersayîş nêame akerden û nayî zey ortaxbîyayîşê derbe hesibna.
DÎHABER/ANQARA