Amed de perê mitingo ke HPDyî seba bale biancê tecrîdê serê Rayberê Şarê Kurdî Abdullah Ocalanî û çalakîyanê grevê vêşanîye ser organîze kerdo bi tewrbîyayîşê hezaran kesan ame destpêkerdene.
Mîtîngo ke bi hezaran kesî tewrê ci bîyî pankartê ke mesajanê waştişê wedartişê tecrîdî, paştîdayîşê girevenê vêşanîye denê û aşitîye wazenê ameyî akerdene. Mêrdîn, Şirnex, Êlih û bajaranê dormeyî ra zî xeylî konvoyî ameyî û çalakwanî bi siloganan kewtî cayê mîtîngî.
Leyla Guvene mesajêk erşawite
Leyla Guvene 75. rojî ya ke hemverê tecrîdo ke serê Rayberê PKKyî Abdullah Ocalanî de yeno meşnayene kewte grevê vêşanîye. Seba mîtîngê Amedî partîya xo HDPyî rê mesajêk erşawite. Guvene dîyar kerde ke heta ke tecrîdê serê Ocalanî peynî nêbo, ê do çalakîya xon dewam bikerî û wina va: “Ma do bi bawerî û îrade xoverdayîşê xo serkewte bikerî.”
Mektubê Leyla Guvene hetê Parlementera HDPyî ya Amedî Dersim Dage ra ame wendiş û mektub de wina ame nuştiş: “Şarê ma yo erjîyaye, hemrayê cinî; merhaba rîyê roşne yê Amed, Botan û Serhedî. Ez şima yew bi yew silam kena. No proseso zehmetin yê tarîxî ke ma tede de yî de, ez wazena vaja ke ma do pîya serkewte bibî. Tecrîdê serê Birêz Ocalanî daîmîbîyayîşê aştîya komelî asteng keno. Birêz Ocalan awankerdişê awankerdişê aştîya komelî de aktorêko muhîm o. No bi ceribnayîşanê teorîk û pratîkî de xeylê reyan îspat bî. Cok ra hayîya komel heme raştîyan ra esto. Roja destpêk ra nata 7 ra heta 70î şar wayîrê çalakîya ma vejîya. Ma bawer kenê ke mi û embazê mi yê zerre vengê xo dayî eşnawitiş û ma do netîce zî bigîrî.
No şaro xoverdekar, cinîyê zerrîwaştoxê azadîye û demokrasîye, ciwan, nifşo ke Dehaqî ra nata hemverê zaliman de sere wedarnayî do reyna werizî payan ser û bedelê ci çi beno wa bibo do serkewtiş bigîrî dest. Bi bawerî û îradeya xo ma do peynîya xoverdayîşê xo de biresî serfirazî. Ez nê rojanê xoverdayîşî de peynîya dêsan de şima heminan silam kena. Bi germîya hemrayîya zerrîya xo şima verik kena.”
AMED