ZEYNEP KURAY / STENBOL / ANF
Parlamentera HDPyî Meral Beştaşe bale ante vero ke grevê vêşanîye yê hemverê Îmraliyî ke hetê Leyla Guvene ra ameyo destpêkerdene hemeyê Tirkîye de vila bibo ganî tecrîdê rê peynî biarîyo.
Parlamentera HDPyî Meral Beştaşe derheqê tecrîdê serê rayberê şarê Kurdî Abdullah Ocalanî de û grevanê vêşanîyan de qisey kerd. Beştaşe vat waştişê Guvene waştişê înan ê zî û wina vat: “Tecrîdo mutleq yo hemverê birêz Ocalanî tenya hemverê ê de nêyo, eslê xo de 80 mîlyon hemwelatijan eleqedar keno û hemverê ameyoxê Tirkîye de yo.”
No hal nêno qebûlkerdene
Beştaşe ard ziwan ke heta roja 27. ya grevî zî hetê îqtîdarî ra derheqê grevî de tu eşkerayîyêk nêamîya dayene, tu gamêk nêerzîyaya û no hal nêno qebûlkerdene. Beştaşe wina dewam kerd: “Leyla Guvene heqdar a; ganî tecrîd tavilî bêro wedartene.”
Beştaşe bale ante serê vilabîyayîşê grevanê vêşanîyan û vat ke seba paştîdayîşî do çar dorê welatî de hetê HDPyî ra grevê vêşanîye bêrê destpêkerdene. Beştaşe vat vero ke nê grevê vêşanîyî hemeyê Tirkîye de vila bibê ganî tecrîdê rê peynî biarîyo
Erdoganî ra gîrîyayo
Beştaşe derheqê qerarê Mehkemeya Heqanê Merdiman a Ewropa (MHME) yê seba tavilî veradîyayîşê hemserekê HDPyî yo verên Selahattîn Demîrtaşî de ke hetê mehkemeya Tirkîye ra no waştiş amebi redkerdene vat “no qerarê redkerdişî hetê mehkeme ra nê hetê Erdoganî ra gîrîyayo.”
Ê qeyûmî do şirê
Beştaşe ver bi nizdbîyayîşê tarîxê weçînitişî vêşîbîyayîşê tepiştişan ser o vinderte û vat ke rixmê nê zextan de zî do îqtîdarê AKPyî nêreso serfirazî. Beştaşe vat: “Ma ancî meclîsî de yê, şaranê Tirkîye de yê. Nê weçînitişan de zî do nêeşkê vernîya ma bigîrê, ê qeyûmî do şirê. ”