Endamê Kordînasyona Tevgera Civaka Demokratîk (TEV-DEM) Hisên Çawiş ku di semînerê de axivî, diyar kir ku ji bo bajaroka Rimêlan mînake pir rengî, bi hevre jiyankirinê û biratiyê ye. Hisên Çawiş, destnîşan kir ku ev mozaîk ruyê rast ê Suriyê ye. Çawiş, anî ziman ku ji bo hemû pêkhateyên Suriyê baweriya wan bi yekbûna demokratîk heye û got; “Ev baweriya me ji bo Rimêlan hîn zêdetir e. Ji ber ku ew Suriyeyek biçûk e. Modela me ji bo hemû pirsgirêkên Suriyê çareseriya bingehîn e.”

Endamê Kordînasyona TEV-DEM'ê Hisên Çawiş da zanîn ku Suriye di krîzek siyasî û civakî ya kûr re derbas dibe û wiha dom kir: “Gelek sedemên vê krîzê yên hundirîn û derve hene. Wekî tevger ji bo me tişta girîng berjewendiyên gelê me û civaka Suriyê ye. Ji bo hemu pirsgirêkên heyîn çareserî Xweseriya Demokratîk a ku em niha têkoşîna wê didin e.”
Çawiş, diyar kir ku Xweseriya Demokratîk, bêyî ku cudahiya ziman, nasname, ol û netewan bike, xwe dispêre hemû beşên civakê.  Çawiş, destnîşan kir ku wê mînaka Xweseriya Demokratîk a li Rojavayê Kurdistanê tê avakirin, wê ji bo Suriyê û herêmê bibe mînak û got ku ewê ji bo vê jî têkoşîna xwe bilind bikin. 

ANHA/GİRKÊ LEGÊ