Li Helebê doh li taxa Miyeser di bombebarana balafirên rêjîmê de 4 zarok û 4 jin bi giştî 14 welatî hatin kuştin. Her wiha li taxên Îzaa û Sukerî gelek welatiyên din hatin kuştin. Çekdarên opozîsyonê taxa Xalidiyê, Cemîliyê, Muhafeza, El-Zibdiyê û Meşarqa topbaran kirin. Ewlekariya leşkerî ya taxa Heleba Nû (Heleb El-Cedîdê) hate topbarankirin. Di encamê de gelek leşkerên rêjîmê hatin kuştin. Li bakurê bajarê Helebê jî li bajaroka Ezazê, bajaroka Heyanê û gundê Şêx Îsa di encama bombebarana balafirên hêzên rêjîmê de welatiyekî sivîl hate kuştin û 7 kesên din jî birîndar bûn.

Li bajaroka El-Bab ya li rojhilatê bajarê Helebê jî balafirên rêjîmê bermîlekî bombeyî bi ser sûka sebzeyan de berda. Di encamê de 4 zarok, 2 jin bi giştî 25 welatiyên sivîl hatin kuştin û bi dehan birîndar bûn. Li rojavayê bajarê Helebê jî di navbera hêzên rêjîmê û çekdarên opozîsyonê de pevçûn derketin.  Li derdora girtîgeha Muslimiyê jî di encama bombebarana balafirên rêjîmê de gelek çekdarên opozîsyonê hatin kuştin.

Li Idlibê şer
Li bajarê Meeret El-Numan  ê girêdayî parêzgeha Idlibê di navbera hêzên rêjîma Baas û komên DAIŞ'ê de pevçûn derketin. Hate gotin ku kuştî û birîdnarên herdû aliyan çêbûne. Li bajaroka Meret Dibisa ku di navbera Idlib û Humsê de ye jî di navbera hêzên Rêjîmê û DAIŞ'ê de pevçûn derketine 2 endamên DAIŞ'ê hatine kuştin.

 HELEB/IDLIB