Doh saet 10:00’an de li Baxçeyê Qelay Şar ya Kerkûkê, bi armanca rakirina tecrîda li ser Rêberê Gelê Kurd Abdullah Ocalan, çalakiya konvedanê hat lidarxistin. Çalakî ji aliyê Tevgera Azadî, Rêxistina Jinên Azadîxwaz û Komeleya Ciwanên Welatparêzên Kurdistanê ve hat lidarxistin û wê çalakî du rojan dewam bikin.
Di destpêka çalakiyê de Komel Serhed daxuyaniya hevbeş ya çalakiyê xwend û got: “ Tevgera Azadî, Rêxistina Jinên Azadîxwaz û Komeleya Ciwanên Welatparêzên Kurdistanê, bi dirûşma ‘ji bo Ocalan azadî’ kampanyayek nerazbûnê ya greva birçîbûnê li dijî tecrîda li ser Ocalan dane destpêkirin. Em tecrîda li ser Rêber Ocalan bi tundî şermezar dikin. Em hemû dizanin ku ev 18 sale Rêber Ocalan di girtîgeha yek kesî ya Îmralî deye û ev çend mehe dewleta Tirk tecrîd li ser Rêber Ocalan daye destpêkirin. Her wiha ev gelek sale ku rê nayê dayin parêzerên wî serdana wî bikin.”
Her wiha Komel Serhed got: “Hemû rêxistinên civaka navnetewî û rêxistina mafê mirovan bi navê CPT jî li gel sucê tecrîdkirina Rêber Ocalan e û çavên xwe lê digrin. Ev rêxistinane di hemû dinyayê de xwe weke parastvanê mafê mirov yê girtîgehên siyasî dibînin û xwe bê agahî dikin.”
Piştgirê rakirina tecrîdê bin
Di dawiya daxuyaniyê de Komel Serhed wiha got: “Em ji hemû gelan daxwaz dikin ku dengên xwe bikin yek û daxwaza azadiya Rêber Ocalan bikin. Ji ber ku azadiya Rêber Ocalan, azadiya gelên bindestên herêmê û mîsogerkirina aştiya herêmêye.”
Biryare ku di çalakiyê de gelek çalakiyên din were lidarxistin. Her wiha biryare ku welatiyên bajêr, partî û aliyên siyasiyên bajêr serdana kon bikin û piştgiriya rakirina tecrîda li ser Ocalan bikin.
SORAN MIHEMED / ROJNEWS / KERKÛK