Li Wargeha Penaberan a Mexmûrê bi beşdariya 200 zarokan 4 dibistanên dayikê bi coşeke mezin vebûn. Ligel ku dibistan vebûn jî hêj serlêdana malbatan ji bo qeyda zarokên xwe berdewam dikin. Li dibistana Şehîd Nûjîn, Dibistana Şehîd Çîçek, Dibistana Şehîd Kamûran û Dibistana Şehîd Mizgîn li her dibistanekê bi qasî 50 zarokan bi awayekî fermî qeyda xwe çêkirin û dest bi perwerdeyê kirin.
Dibistana dayikê li Mexmûrê her sal di meha gulanê de dikevin betlaneyê û ku meha cotmehê jî bi awayekî fermî dest bi perwerdeya xwe dikin îsal jî dest pê kirin.
Dayikan destên zarokên xwe girtin û anîn dibistanê. Di heman demê de wan bi mamosteyên wan re dan nasîn û zarokên xwe radestî mamosteyên wan kirin. Zarokan bi kêfxweşiyek mezin berê xwe dan parka lîstikê û bi hev re lîstin. Hin zarok şermokbûn lê ew jî tevli lîstika zarokan bûn. Zaroka bi navê Viyan Guler wiha digot: „Ez hatime fêrî xwendinê bibim û bilîzim“.
Mamoste zarok xistin pergala ketina dibistanê û yek bi yek navên wan xwend û ew derbasî dibastanê kirin. Mamoste yek bi yek navên zarokan pirsî û hevalên wan ji bi wan dan nasîn.

Roja destpêkê dayik jî li dibistanan ligel zarokên xwe man.

MEXMÛR - DÎHA