Goristana ku mehek beriya niha dest bi xebatên wê hatiye kirin, li ser erdekî 15 hezar metre mezin e, tê çêkirin. Erdê ku goristan li ser tê çêkirin jî, berê wekî erdê xezîneya dewletê dihat zanîn, lê niha di destê rêveberiya gel de ye. Saziya Malbatên Şehîdan jî, piştî ku bi rêveberiya Meclîsa Gel a Bajêr re hevdîtin pêk anîn, biryar daye ku li vir “Goristana Şehîdan” çêbike.
Pêdiviyên goristanê yên wekî çîmento, demir, xîz (qum) û hwd. bi alîkariya gel hatine stendin. Kesên ku di çêkirina goristanê de kar dikin jî, bi dildarî dixebitin. Her wiha ji Komîteya Karkeran a girêdayî Meclîsa Bajêr jî her roj 2-3 kes tevlî xebata çêkirina goristanê dibin.
Li goristanê her wiha bi navê “Mala Şehîdan” avahiyek dê bê çêkirin. Di vî avahî de wêneyên gerîlayên jiyana xwe ji dest dane û li vê goristanê hatine definkirin, dê bêne daliqandin. Li vê malê her wiha ji bo malbat û welatiyên ku tên ziyaretê jî, dê cihê bêhvedanê hebe. Dîsa dê li goristanê mizgeftek û cihê destşoyê jî bê çêkirin.
Li goristana ku tê pilankirin heta mehek, mehek û nîvan bê temamkirin, cenazeyên 3 gerîlayan hatine definkirin.
ANF/QAMIŞLO