3'ê Tebaxê çete berê xwe dan Şengalê, bi sed hezaran mirov ji nişka ve rastî gefa komkujiyê hat. Piştî ku hêzên Herêma Kurdistana Federal ên bi ewlekariya herêmê berpirsyar xwe ji herêmê vekişand, gel li pêşberî hovîtiyê bêparastin ma. Yên karîbûn ji mala we birevin reviyan, bi deh hezaran Şengaliyan jî xwe li Çiyayê Şengalê girtin. Dijminên mirovahiyê gund û bajar dagir kirin, dest bi tinekirina her tiştên pêwendiya xwe bi çanda Êzîdiyan heye, kirin. Mirov bi awayekî komî li cihekî hatin komkirin û bi awayekî hovane hatin kuştin.  Çeteyên di 15'ê Tebaxê de ketin gundê Koço, jin û mêr li cihekî civandin û mêran li derveyî gund kuştin. Bi hezaran jin û zarokên keç hatin revandin û ew birin cihên din ên di bin kontrola çeteyên DAIŞ'ê de.

Xetereya zivistanê

Bi êrîşan re sivîlên li çiyê asê mane, bi gefa komkujiyê re rû bi rû ne. Zêdeyî 10 hezar sivîl li Çiyayê Şengalê asê mane. Bi nêzîkbûna mercên zivistanê re, mercên jiyanê jî zehmet dibin. Ji ber mercên avhewayê, di nav Cotmehê de du zarokan jiyana xwe ji dest dan. Di dagirkirina Şengalê de, ji destpêkê û heta niha bi sedan zarokî jiyana xwe ji dest dan. Pêwîstiya Şengaliyan bi pêlavên ji bo zivistanê, kincên qalin, xwarin, ava vexwarinê, derman, ji bo germkirinê bi sotemeniyê, heye. Xeteriyeke giran a birçîbûnê heye. Erzaqê di destê Şengaliyan de, bi tenê têra 20 rojan dike. Ancax ji hewayê ve alîkarî li herêmê bê kirin. Li gel gefa birçîbûn û komkujiyê, xeterî heye ku ev şaristaniya xwedî paşerojeke bi hezaran salan ji bingeha xwe bê qutkirin û bê tinekirin. Çete, qadên pîroz ên Êzîdiyan hîna jî bombe dikin.

ANF/ŞENGAL