Li Stenbolê bi boneya perwerdehiya zimanê zikmakî, rakirina astengiyên li hember ziman û 'Sonda me' li 16 navçeyan çalakiyên hemwext hatin lidarxistin. Bi sedan kes tevli çalakiyan bûn û dirûşmên "Bê ziman jiyan nabe", "Zimanê me rûmeta me ye" hatin berzkirin. Di çalakiyan de hat gotin ku berpirsyariya dewletê ew e ku zimanê zikmakî neyê astengkirin û wiha hat gotin: "Ger nifşên din ziman bi kar neynin ev tê wateya tunekirina çandê. Partiya îktîdarê û partiyên muxalefetê bi gotinên balkêş yên 'Dê perwerdehiya Kurdî welat perçe bike' ve li hember perwerdehiya Kurdî derdikevin." Di daxuyaniyê de hat gotin ku di makeqanûnê de hê jî perwerdehiya zimanê zikmakî hatiye astengkirin û ev yek şerm e û wiha hat gotin: "Li Tirkiyeyê zilmeke din ku li Kurdan tê kirin ew e ku her serê sibê 6 mîlyon zarokên Kurd li dibistanan sond dixwin. Perwerdehiya zimanê mafekî gerdûnî ye. Li Tirkiyeyê her roj serê sibê bi xwendina 'Sonda me' ve tê xwestin ku zarokên Kurd bibin tirk, bi tirkbûna xwe serbilind bibin û hebûna xwe bikin qurbana hebûna tirkan. Em dibêjin ev pêkanîna nîjadperest, faşîst û pişaftinê zilm e, şerm e û guneh e. Bila ev pêkanîna faşîst demildest bi dawî bibe.
FATÎH: Rêxistina BDP'ê ya Fatîhê li ber Îstasyona Metro ya Aksarayê daxuyanî da. Gelek kes tevli daxuyaniyê bûn û di çalakiyê de dovîzên wekî; "Zimanê me rûmeta me ye", "Bila Sonda me bê rakirin", "Bila hebûna min diyariyê hebûna kesekî nebe" hatin vekirin û dirûşam "Bê ziman jiyan nabe", "Perwerdehiya zimanê zikmakî mafê me ye" hatin berzkirin. Daxuyanî bi Kurdî û tirkî hatin xwendin. Serokê rêxistina BDP'ê ya Fatîhê Murat Canoglu anî ziman ku bi salane 'Sonda me' tê xwendin û wiha got: "Ger daxwazên gelê Kurd neyê pejirandin aştî pêk nayê." Canoglu destnîşan kir ku mafê perwerdehiya zimanê zikmakî mafek e.
KADIKOY: Rêxistina BDP'ê ya Kadikoyê û rêxistina BDP'ê ya Uskudarê li Meydana Îskeleyê ya Kadikoyê daxuyaniya hevpar dan û gelek kes tevli daxuyaniya çapemeniyê bun. Di çalakiyê de bênavber dirûşmên; "Bê ziman jiyan nabe", "Zimanê me rûmeta me ye" hatin berzkirin. Daxuyaniya Kurdî ji aliyê rêvebira BDP'ê Uriye Kalkan û daxuyaniya tirkî ji aliyê hevserokê BDP'a Kadikoyê Adnan Kaçmaz hatin xwendin.
BEYOGLU: Ji aliyê rêxistina BDP'ê ya Beyogluyê bi tevlibûna hezaran li taxa Haciahmetê daxuyanî hat dayîn. Di çalakiyê de zarokan dovîzên "Ziman jî bi perwerdehiye tê parastin" hatin vekirin û dirûşmên; "Bê ziman jiyan nabe", "Kurd Kurdî Kurdîstan" hatin berzkirin. Daxuyaniyên bi Kurdî û tirkî ji aliyê hevserokên rêxistina BDP'ê ya Beyoglu hatin xwendin.

Her wiha li navçeyên Stenbolê yên wekî; Maltepe, Umraniye, Pendîk, Sancaktepe, Ataşehîr, Kartal, Sultanbeylî, Arnavutkoy, Eyup, Sultangazî, Şîşlî, Kagithane, Zeytînburnu, Esenlerê bi heman armancê li ber avahiyên BDP'ê û Midûriyeta Perwerdehiya Neteweyî yên navçeyan, daxuyanî hatin dayîn.


DÎHA/STENBOL  



KURDÎ-DER ji bo ziman meşiya

Şaxa KURDÎ-DER'ê ya Îzmîrê ji bo perwerdehiya zimanê Kurdî û astengiyên li hember ziman meş lidarxist.
Endamên Şaxa KURDÎ-DER'ê ya Îzmîrê ji bo perwerdehiya zimanê Kurdî û 'Sonda me' ku her serê sibê li dibistanan tê xwendin bê rakirin, li pêşiya Konak Pîer AVM hatin cem hev û heta Sumerbanka berê meş lidarxistin. Ji bilî endamên KURDÎ-DER'ê gelek kes tevli çalakiyê bûn û di meşê de pankarta "Êdî bes e, em perwerdehiya bi zimanê xwe dixwazin" hat vekirin û dirûşmên; "Bê ziman jiyan nabe", "Bijî berxwedana Rojava" hatin berzkirin.

Piştî meşê li ser navê girseyê endamê KURDÎ-DER'ê Mehmet Adsiz daxuyanî xwend û balkişand ser girîngiya perwerdehiya zimanê zikmakî. Adsiz da zanîn ku ji holê rabûna ziman, ji holê rabûna çanda gelekî ye û Adsiz xwend 'Sonda me' ku li dibistanan tê xwendin bê rakirin.  Piştî daxuyaniyê çalakî bi dawî bû.


ÎZMÎR