18 dewanê Licê ke roja yewşeme qedexe ame îlankerdiş û bi tewrbîyayena hezaran lejker, polîs û qoricîyan operasyonê lejkerî destpa kerd, yeno bombevornayen. Goreyê zonayîşan quwetê dewlet ke çormeyê dewam girotîyo erzenê ser keyeyan.
Dewê ke mintiqeyê operasyonî de yê bi teyareyanê şer û helîkopteranê kobra û skorsky bi rojano yeno bombevornayen. Wesayîtanê zirxî, 17 helîkopter, 33 kobra, 35 kîrpî, 16 ejder û wesayîtê Land Rover ra pîya 7 hezar cendirme, 600 tîmê taybet û 559 qoricî, sewqê na mintiqe bî.
‘Erzenê keyeyan ser’
Operasyon sînorê Licê û Dera Henî de, mintiqeyanê Zengesor, Xosor, Mergê, Mizak, Hendiv, Barav û Axtiganê de yeno ramiten. Rayê nê dewan şîyayîş û ameyîşî rê ameyê girewten û nika quwetanê dewlet çormeyê dewam girewto. Goreyê zonayîşan quwetê dewlet ke çormeyê dewam girotîyo erzenê ser keyeyan. Herzewbîn makîneyê kar zî rayanê ke rîwalê vewr girotîyayê, akenê.
Herêma ke operasyon esto de şebekeyê telefonan ameyê birnayen.
Xosor de binçim girewtiş
Goreyê îdiayan dewa Xosor de welatijê bi nameyê Remzî ke bi tenya ciwîyeno ameyo binçimkerdiş. Keyeyê ke zimistanî de kes nêmaneno zî kêberê ci yenê şikitiş û cipersyayîş estê. Herzewbîn herem de nêverdanê ke welatijî bivejyê teber û heywananê welatijan 4 rojîyo axiran de veyşanîye.
Herem bi temamî hetê lejkeran girotîyaya bin ablûqa, dewan ra pîya 28 noqteyê cipersyayîşî ronîyayê. Raya Amed û Çewlîg de wesayîtî yenê vindernayen. Ame zonayîş ke lejkerê Qereqola Baverê heqaretê welatijan kenê. Goreyê îdiayan çoltera dewanê Mizrag û Hendîvê de wext bi wext vengê tifingan û pêrodayîşan yeno. Nika guman esto ke aqibetê dewanê Nisêbîn Xerabê Bava û Talatê bîyarîyo Licê ser.
Heyet şino herêm
Rîwalê operasyonî heyeta ke Kongreya Civaka Demokratîk (KCD), Tevgera Cinîyê Azad (TJA), Partiya Demokratîk ê Şaran (HDP), Partiya Herêman ya Demokratîk (DBP) ra ca yeno vizêr waşt şiro herêma operasyonî û vernîya merdişan bigîro.
AMED