7 endamê Îdareyî yê Kooperatîfî yê demkî estê.Koordînatorê Projeya Averberdişê Zîreto Organîkinî yê Serekîya Averberdişê Ekonomîya Herêmî A. Menaf Şekerî derheqê xebatan de melumat da û vat: “No kooperatîf hetê berardiş, rotiş û modelbîyayîş de wayîrê yew mîsyonî yo. 17 qezayanê ma yê bînan de zî winasî problemî estî. Ma nika Licê de na game eşta. Ma dê sibaroj qezayanê ma yê bînan de zî winasî projeyan bierzê falîyet.”
Rotişê ey yeno kerdiş
Şekerî dewamê qalîkerdişê xo de wina vat: “Toximo ke Navenda Genî de yeno berardiş dîyeno endamanê kooperatîfî û bazaran de rotişê ey yeno kerdiş. Çarçiweya proje de navenda Amedî de Bazarê Zîreto Organîkin yeno ronayîş. No bazar de çîyê hetê citkaranê Licêyijan ra yenê ronayîş û resnayîş, kooperatîf ser o yenê rotiş. Bi nê kooperatîfî citkarê ma hîna aver şonê. Kooperatîf ser o citkarê ma eşkenê xeylê desgeyan ra fonanê hîbeyî bigîrê û tira îstîfade bikê.”Şekerî îzah kerd ke ê do sibaro semedê hêgayanê bêawin, peyser qezençkerdişê erdanê lêminan hadre bikê û wina vat: “Ma nê xebatan de îstîhambîyayîşê cenî û ciwanan esas gênê. Ma kenê ke bi projeyanê kooperatîfbîyayîşan ciwanan biance xebate. Şaredarîya Şaristanê Girde ya Amedî hêgayan de 45 donim ca ser o leyekê goze,15 donim ser o leyekê vamêre û gilyaze ameyê ronayîş. Semedê zîreto organîkin aşma hazîrane ra tepîya prosesê sertifikasyonî dest pê keno.”
Muxtarê Taxa Daralanî û serekê kooperatî yo diyîn Yusuf Pekerî zî derheqê babedî de wina qiey kerd: “No demêko derg o ke ma waştênê yew kooperatîf awan bikê. La ma nêeşkayênê yew kooperatîf ronê. Semedo ke Şaredarîya Amedî îmkan daya ma, ma spas kenê. Ekîbê şaredarî tenya kooperatîfbîyayîş dir eleqedar nêbenê, her tim zanayîş danî.”
DÎHA/AMED