Operasyon û pirodayîşê ke qezayanê Amedî de destpa kerdî, roja hîreyîn de zî dewam kerd. Netîceyê pirodayîşanê Licê de 3 lejkerî merdî, 5 lejkerî û 1 qoricî bî dirbetin. Lejkeran dewa Zara kerd veng û yew bi yew keyeyan de geyrayîş kerd.
Çortalê 104 dew û dewokanê Licê, Hezro, Pîran, Karaz û Pasûr de operasyon û pirodayîşî ramenê. 10 hezar ra vêşêr leşker, polîs û qoricî tewrê operasyonî benê. Vizêr seatanê sodir de, çortalê qezaya Licê de mavêna lejker û gerîlayanê HPG de pirodayîşî vejyay. Netîceyê pirodayîşan de 2 lejkerî bî dirbetin û hewadîyay nêweşxaneyê Amedî. Seatanê nêmroje de zî pirodayîşî qewimyay û 3 lejkerî merdî. 4 lejkerî zî bî dirbetin û hewadîyay nêweşxane.
Dewa Zara veng kenê
Lejkerî zextî ser dewijan kenê û hewl danê ke dewan veng bikerê. Dewa Zara de lejkeran anonsê “mîyanê 10 deqe de dewe terk bikerê, teyare û helîkopterî dê bombebaran bikerê” kerdî û dewijan tehdît kerdî. Ser nayî cinî, kal, pîr û nêweşî kewtî ray. Lejkeran yew bi yew keyeyan de geyrayîşî kerd.
Dersim de qedexe derg bi
Heto bîn ra qedexeyo ke 31 herêmanê Dersim de ame îlankerden, bi behaneyê operasyonî ame dergkerden. Qedexeyo ke 16ê Gulane de Pûlûr, Pilemorî, Xozad û Nazmiye de ame îlankerden, mavêna 30ê Gulane û 14ê Hezîrane ame dergkerden.
AMED/DERSIM