5 welatijê ke dewa Licê Fîs de netîceyê wesayîta zirxî yê lejkeran gina wesayîta înan ro weşîya xo kerdî vinî, Mezelxaneyê Yenîkoyî de amey definkerdiş.
Cenazeyê welatijê bi nameyê Mahmût Oner, Mevlut Dagtaş, Abdulhamît Dagtaş, Fikrî Demîrbaş û Zeynep Demîrbaş kişta pê de amey definkerdiş. Parlamenterê û îdarekarê HDP û yê DBP ra pîya hezaran welatijî tewrê merasîm bî. Welatijan merasîm de polîsanê kiştox ra nêrazîbîyayîş damûsnay. Malbatan vistî vîrî ke çîyo ke bi qeza nîyo, qetlîam o û aşkere kerdî ke hona zî derheqê polîsê ke bi meqsed qeza viraştî de heta nika tehqîqat nêame destêkerdiş.
No mabên de verîya 4 rojan zî, bi eynî metodî û eynî ca de 2 sivîlî hetê polîsan amey kiştiş. Nê 5 welatijî zî wexto ke serweşîya nê 2 welatijan ra ageyray, raştê hêrişî amey. Quwetê dewlet zey metodêko newe bi wesayîtanê zirxî pêroginenê sivîlan û înan qetilkenê. Tenya jû serra peynî de 25 welatijî bi no şiklî amey kiştiş.
AMED