Hezro û Karaz ra pîya qezaya Amed Licê de qedexeyo sifte 18ê Hezîran de destpa kerd û no qedexe ra pîya teyareyanê lej destpa bombevornayene kerdî. 21ê Hezîran ra tepya bi desan dew û mintiqeyê bînî yê Licê amey tomete kerdene. Çarçoveyê na qedexe de bi hezaran lejker, qoricî, tanq û topan ra pîya teyareyê lejî zî tewrê operasyonî benê. Kerdenanê quwetanê dewlet ke sewqê qeza bîyê serranê 90î ravêrnayî.
Çarçoveyê na operasyonî de fina dewî yenê rijnayen û veşnayene. Herzewbîn dewan ra pîya dar û berî, koyî yenê veşnayene. Adiro ke verîya 4 rojan mintiqeya Sisê de destpa kerden beno vila û eskerî destûr nêdanê ke dewijî midaxaleyê adirî bikerê.
Dewî açarnay qerargeh
Lejkerê ke dewanê Licê de terora dewlet ramenê ser welatijan de vengkerdişê dewan ferz kenê. Badê tepeyanê berz de mewzî ronayenî, nika zî eskerî kewnê dewan û xêmî ronenê. Bi hezaran eskerê ke operasyon de ca gênê deweka Licê Licok girotî bin ablûqe û xêmî ronay. Dewijê ke wazenê vejerê teber hetê eskeran bi tehdîdê merdişî yenê manîkerden. Licok de di welatijî hetê eskeran amey binçimkerden.
Dewanê Banê Dera, Entax, Cimar û mintiqeyanê Çeme Zixor de pirodayişê girdî qewimyenê. Herem ra hereketîna helîkopteran ra pîya vengê teqînayiş û tifingan zî berz beno. Pirodayişan de 2 eskerî merdî.
Mertalê ganî
Rîwalê vindernayenê operasyon û pirodayişan 75 kesê ke waştî şirê Licê, dekewtişê qeza de 24ê Hezîran de amey binçimkerdene.
75 kesê ke mîyan de hemşaredar, îdarekarê HDP, BDP û temsîlkarê sazgehanê sivîl zî estê 24ê Hezîran de ser yardimwaştişê dewijanê Hedîk û Xosor ke mavêna Licê û Çewlig de yê de kewtî hereket. Dewijan telefonê rêxistinanê DBP û HDP kerdî û ciresnay ke garantîyê ciwîyayişê înan nêmendo û hetê eskeran yenê tehdît kerdene. Ser nay mertalê zindî ke waştî vernîya merdişan bigîrê û operasyon vindarnê hetê Licê kewtî ray, la hetê quwetanê dewlet amey binçimkerdene. Mertalê ganî roja sifte Qereqolê Cendirmeyan yê Abali de amey giroten, peycoy rîwalê qontrolê weşî rişîyayî nêweşxane. Mertalê ganî vizêr zî rîwalê dayişê girotişê îfade bi 3 otobus berdîyayî Şûbeyê Midûrîyeta Emnîyet yê sûk.
‘Nêşkenê kurdan biqedînê’
Heto bîn ra Parlamenterê HDP, îdarekarê DBP ra pîya xêlê welatijê ke vizêr waştî şirê cayê operasyon vetişê Amedî de amey manîkerdene. Verîya ke şêlig hereket bikero ver bana KCD yê Amedî de damûstayîn ame dayen. Parlementera HDP ya Amedî Nûrsel Aydogan ke qisey kerd vist vîrî ke yew hefteyo ke xeta Amed-Çewlig de operasyon yeno ramitene. Aydogan da zonayene ke operasyonê no şiklî wextê Şêx Seîd ra na het 90 serrîyo yenê ramitene. Nûrsel Aydogan da zonayene ke AKP nêşkeno bi operasyonan kurdan biqedîno û bi nê polîtîkayan Tirkîye zî beno kaosî. Badê manîkerdişî, heyet wextekê vindîya û peycoy ageyra Amed.
DÎHA/AMED