Ez yew çîyê wazena eşkera binûsî û vajî. Eke mi rê persa 'Kurdistanî de cayê tewr welatperwer ça yo?' bîro kerden, ez yew salîse zî fikirnêkena û sey lezvatey vana; Licê… Hezar reyî van Licê ha Licê…

Kurdistanê de yew cayê zî sey Licê bedêl nîdaw o. La Licê çi wext (qet) zî serê xo dişmenî(neyar) rê nizm nêkerd. Kurdîtî xo ra û Kurdistanîbîyayîşê xo ra nêameyo war. Licê, dema Şêx Seîd de Şêx Seîd ra bî.  Licê, 1927 de Pêçar Tenkîl Hereketî dî. Dewleta tîrkî a çaxî Licê û dewê Licê de qirkerdiş viraşt.

Licê, 1969 de Mîtîngê Rojhilatî yê Kurd û Kurdistanî de pêşengî kerd. Licê, erzdlerzê 1975 de xirab bi. Reyna sey belangazî milê xo çewt nêkerd. Hembere dewleta tirk xoverdayîş kerd. Licê, awankerdişê PKK ra wayîrî kerd. Neyar nê taybetmendîyê Licê weş zano. Qey (serva) nayî tim û tim hêrîşê Licê keno.Neyarî hema hema serranê 1990 de zafê dewe Licê veşnayî. Tena dewî nêy, neyarî 1993 de qezayê Licê zî veşna. Hêrîşê Licê kerd. Bi 30 zedayîr însanê ma zereyê qezayê Licê de şehîdkerdî. Çi destê neyarî ra ame kerd. La reyna Licêyîjan welatperwerîya xo ra fek veranêda.  Goreye ke ez Licê şinasnena, dewa ke şehîd nêdawo çîna. Licêyîjan reyna fek dewayê xo ra veranêda.

Zereyê Licê de mehleya ke şehîd nêdawo çîna. Her weçînayîş de zî cayo ke tewr zaf reyê xo dayo partîyanê Kurd reyna Licê yo. Hetê xoverdayişî zî hina yo. 

Licê pêronê prensîbê welatperwerî de Kurdistanî de yewin o. Amed paytextê Kurdistanî yo. La Licê paytextê Amedî yo. Licê gan û rihe welatperwerî û xoverdayîş yê Amedî yo. Licê nêbo, Amed nêbeno cayê serhildan û xoverdayîşî yo. Kam wazeno bimuso ke welatperwerîya Kurd û Kurdistanî senîna, gera şêro Licê de çend rojî bicuyo.Kam wazeno bibo welatperwer, gera xo rê Licê nimûne bigero.

Qeza bena wa qezayê Licê, dew bena wa dewê Licê, însan beno wa însanê Licê xo rê nimûne bigîro. Pêronê dew, bajar û însanê Kurdistanî xo rê Licê nimûne bigerenê, neyar nêşkeno Kurdistanî de bimano. Na raştîyêk zelala. Neyar na raştî hol zano, goreyê na raştî tim û tim hêrîşê Licê keno. Tetîkeşê neyarî zî na raştî hol zanê, rasterast Licê hedef nîşandanî.

Ebdulqadîr Selvî hina kerd. Erdogan û artêşê tirk eyê ra vano, Licê hedef nîşanbidi. O zî tetîkkeşî keno û ser Licê nuşte nusneno û Licê hedef nîşandano. Nuştêyê Selvî dima ra,  pêronê dew û mezrayê nê dewan ser qerarê operasyonê ame dayîş. Verê cû pê (bi) helîkopter û teyaran nê dewî ameyê bombekerdiş. Dima ra zî esker vejîya operasyon. Ewro Licê de qirkerdiş esto. Tena dewa Kerwasî de bi desan însanê ameyê îşkencekerdiş û Mehmet Şîrîn Kocakaya mîyan de qalê 3 şehîdan yeno kerdiş. 

Gem û xeydê Licê û dorûverê Licê sey Darahênî, Henê, Pasûr, Hezro û Farqîn eyê hetan veşnenî. Dewan veşnenî, veng (tol) kenî. Însanê ma cayê û waranê xo ra vejenî. Neyar verê cû zî, nika zî hina xela û bela ano serê Licê. 

Neyar serkewt? Nêy. Xora HPG aşkerekerdiş da. HPG zî vist vîrî ke operasyonê dewleta tirk yê Licê û dorûverê Licê virt û veng vejîya.  Raşta, neyar her wext hina hêrîşê xo dibare keno. Neyar hina keno, resêno meqsedê xo? Nêy.Licêyîj tersenî? Nîy. Fek welatperwerîyê xo ra veradanî? Nêy. Fek Kurdîtî û Kurdistanîbîyayîşê xo ra veradanî? Nêy. Licêyîjî hina bişerefî, ser nayî yew vateyê Licêyîjan esta. Vanî, “Wexto ke to perodayîş (kotek) werd mevaji ez Licêyîja. La wexto ke to dapêro a çaxî vaji ez Licêyîja.” Bena zê yarî zî bêro vatiş. La raştîya nê vateyê esta. Licêyîjî binvistiş qebûl nêkenî. Licêyij vanî: Serkewtiş! Serkewtiş! Serkewtiş!

Licêyîj hembere neyarî qet û qet milê xo çewt nêkenî. Bi yeqînî neyarî ra qesasê xo gênî. Pêronê şarê Kurdistanî, pêronê dew, qeza û bajarê Kurdistanî sey Licê û Licêyîjan bikerenê, xelasîya.  Kurdistanî bi aşman nêy, bi rojan beno. Çunke Licê Kurdistan o. Çunke Licê ruhê serwederatişî yo. Çûnke Licê xelasî û azadîya Kurdistanî yo.