Na qorî ca welatê Amerîkaya Latin Arjantîn o. Pêrokin parzemîn bi bîyayişeke hov lerzîya. Na biyayiş heme dinya de veng da. Bê guman tewr vêşêr zî tesîreke gird cenîyan ser o kerd.
Kênaya 16 serrî Lûcîa Perez verîya çend hefteyan, serê aşma cotmeng de amêbî kiştiş. Merdişê Lûcîa ra vêşêr, şiklê kiştişê ci herkesî şoq de terna. Lûcîa bi hewayeko merdî hetê 2 merdekan wedarîya nêweşxane. Kesê ke cesedê ayî berdî nêweşxane îdia kerdî ke, rîwalo ke ayî madeyê narkotîk vêşêr girotîyo’ merda. La dima ra doxtoran tespît kerd ke Lûcîa raştê şîdeta cinsî ameya. Ser nayî dawa abîya û dozgeran zî sereraşt kerd ke Lûcîa rê verikîn esrar û kokaîn ameyo dayen, dima ra zî raştê îstismara cinsî ameya. Na îdia Arjantîn ra pîya pêrokîn parzemîn de bî sebebê înfialî.
Çîyo ke dozger ardî ziwan, him gonîya însanî vindarneno, him zî dejenerebîyayişê sîstema serdest rafîneno ver çiman! Serdozgero ke dawa weyneno aşkere kerd ke, Lûcîa rîwalê dejo ke bi cîsmekê vistiyê anusê ayî qelbê ci vindîyayo merda. Kesê tecawizkar, seba ke bîyayiş zey ‘bi sebebê tiryak' bidê damusnayen, bado ke Lûcîa merda ganê ci şiwitê û çinayê (kinc) ci vûrnayê.
Nika na bîyayiş ra dima ganî mordem se vajo? Ma cayo ke endî qisey qedîyay de yê, cayo ke însanîyet ver gandayişî de yo yê. Ganî ma na bîyayiş senî terîf bikerê, kamî mesûl bivînê. Gelo sûcdarî tenya 2-3 hêrişkarî yê, ya zî sîstemê serdest ke pêrokîn dinya çarnayo mezelxane yo? Sebebê însanîyet ra vejyayişî, sebebê vindîkerdişê erjayeyanê mordemîye çik o? Herkes nika qalê herbê lejkerî û bi tifingî keno. La lejê tewr gird zî mavêna cenî û camêrdan de yo. Û no lej panc hezar serrîyo rameno. Her roj pêrokîn dinya de bi desan cenî kişîyenê, bi seyanê ci zî raştê şîdetî yenê. Her serr bi hezaran cenî benê qurbanê no lejî. Çike bingeyê no lejî de îdeolojîya cinsîyetperwerî esta. Goreyê na îdeolojî cenî nîme însan ê, xîzmetkarê camêrdan ê. "Gunehkar", "sûcdar", "şermdar", "cadû" "îblîs" û "leymin" ê.' La na sîstem qebûl nêkena ke çîyo leymin û gunehkar na zihnîyeta ci ya. Na zihnîyeta camêrdîya nêweşîn bi qanûnan, bi hiqûq, bi sîstemê perwerde, bi sîyaset û bi pêrokîn wasitayanê xo qirkerdişê cenîyan teşwîq û rewa kena. Cok ra parzemîn, welat, sûk ferq nêkeno. Cenî cenî yê û ci rê eynî qeder yeno ferzkerdiş.
Vizêr Stenbol, Yenî Delhî, Îran, Hewlêr de, ewro Arjantîn, Asya, Afrîka, Awrûpa, Awusturalya de eynî estanik xo dibare kena. Ozgecan Aslan Stenbol de aşma Sibat 2015 de raştê tecawiz amê û dima ra zî amê veşnayiş. Paytexta Hîndîstan Delhî ya Newî de jû cenîya 23 serrî raştê tecawizê çend kesan amê weşîya xo kerd vinî. Na bîyayiş ra dima no welatî de xêlê bîyayişê bînî qewimyay. Ma Reyhaneh Jabbarî xo vîra nêkerê. Rîwalo ke xo hêrişê îstismara cinsî ra pawite hiqûqa Îran verîya 2 serran ayî îdam kerd.
Kurdistan de wextê nezdî de dewleta tirk ya dişmenê cenîyan bedenê cenîyê xoverder kerd viran û kuçeyan de teşîr kerd û waşt bi nayî îradeyê şarê kurd bişikînê. Xo ra bi serrano welatê Erdogan o ke nêweşê şîzofren û huntîngton o de zî kiştişê cenîyan bi polîtîka, vatiş û qanûnan yeno teşwîkkerdiş.
Zey cenî ma nê pêrokîn sebep û netîceyanê zînîyeta nêweşîn zanê, hêrişkaran rind silasnenê. Cok ra zey cenîyanê Arjantînî ma vanê endî 'Machîsta' (şovenîzma camêrdan) ra bes o. Ganî şima vengê bi mîlyonan cenîyê ke seba seveknayişê heqanê xo vejyenê meydanan endî biaşnawe.