Çalakîya Nobeta Wijdan û Edaletî ke hetê Partîya Demokratîke ya Şaran (HDP) ra ameybî destpêkerdiş, hewteyo 3. de dewam kena. Çalakîya ke Amed de dîyaybî destpêkerdiş û dima ra Stenbol de dewam kerdbî, nika bajarê Wanî de domîyena. Çalakîye roja xo ya 7. de Parka Aştî ya Musa Anterî de dewam kena.
Kombîyayîşê çapemenî yê ke rojane yeno kerdiş de sifteyîn mesajê Hemserekê Pêroyî yê HDPyî Selahattîn Demîrtaşî ame wendiş û dima ra Hemsereka Pêroyî ya HDPyî Serpîl Kemalbaye qisey kerde.
Kemalbaye qiseykerdişê xo de sifteyîn şarî silam kerde û wina va: “Ma Nobeta Wijdan û Edaletî de pîya yî. Çalakîya ke Amed de dest pêkerde û Stenbol de dewam kerde, ewro Wan de, siba zî do Îzmîr de bidomîyo. Ma rojanê muhîman cuyenî û seba ke mudaxaleyê nê prosesî bikerî, ma têkoşînêko winasî da destpêkerdiş. Parlamenterê ma binê tecrîdêko giran de yî. Şar bi têkoşînî barîkatan derbaz keno û wayîrê îradeya xo vejîyeno. Cok ra ez spasîya xo înan rê kena.”
Ma do awan bikerî
Kemalbaye va ‘ma bawer kenî ke ma do nê şîyayîşo tarî bivindarnî’ û wina dewam kerde: “Ma do Tirkîyaya ke hetgirê azadî û aştî ya, awan bikerî. Bajarê Wanî Fîgen Yuksekdage û Tugba Hezere erşawit Meclîs, labelê bi hawayo bêhuqûqî parlamenterîya înan ameye betalkerdiş. Şima se kenî bikerê, şima nêşênî Yuksekdage, Hezere yan zî sewbîna embazê ma, ma ra biqerfnî. Şima çira hende şarê Wanî ra tersenî? Çira hende polîs û leşkerî tîya de yî? Çira heme keyeyî binê abluqa de yî? Vera îradeya şarî de rêze bigîrênê û qayûm, polîs û panzeranê xo tîya ra biancênê.”
Ma bi hawayo baş şinasnenî
Kemalbaye bale ante vatişanê ‘Tirkîya de dewletêka newe awan bena’ ser û wina va: “Ayhan Oganî nêyî va, labelê ê bînî hewl dayî serê nê vatişî bigîrî. Oganî îtîraf kerd. Dewleta newe ke qala aye yena kerdiş 100 serrî yo ke esta. Seba şaran çîyêk nêbedilîyayo. Dewleta newe sîstemo tekperest yê îqtîdarê AKPyî ya. Ma dewleta newe Cizîr ra, Roboskê ra, Dayîka Taybete û Ugur Kaymazî ra şinasnenî. Dewleta newe tena kurdan nê, heme hetan tersnena. Ganî komel zî vera na dewleta newe de têkoşînê xo berz bikero.
Kemalbaye qiseykerdişê xo de qala veşayîşê Dêrsimî û çîyê ke dewa Şapatanî de ameybî cuyayîş zî kerde û wina qedênaye: “Vernîya ma de donemêko muhîm yê têkoşînî esto. Ma nê donemî sey seba aştî û demokrasî donemê têkoşînî şinase kenî. Cok ra ma veng danî herkesî; ma seba pîya meşîyayîşî amade yî. Ma do cuya ke xeyal kenî, pîya awan bikerî. Nê semedî ra ez veng dana şarê ma wa beşdarê çalakîya ma bibî. Ez tîya ra heme parlamenter, şaredar û îdarekaranê ma yê tewqîfbîyaye, silam kena.”
DÎHABER/WAN