BAHOZ AMED / ANF/BEHDÎNAN
12ê Êlule 1980 de hetê Kenan Evrenî ra derbeyêk ameybî viraştiş û ewro serrgêra 37. ya Derbeya 12ê Êlule ya.
Fermandaranê gerîla ra Ayhan Sîpanî derheqê Serrgêra 37. ya 12ê Êlule de qisey kerd û vînayîşê xo ard ziwan.
Fermandar Sîpanî va ‘wexto ke PKK 1978 de awanbîyayîşê xo îlan kerd, hetê dewleta tirkî ra sey tehdît ame dîyayîş’ û wina domna: “Dewleta tirk bi hetkarîya Gladîoya NATO 12ê Êlula 1980î de derbeyêka tasfîyekerdişî viraşte. Na derbe sere de seba teslîmgirewtiş û çinîkerdişê Tevgera Apocî û şorişgeranê tirkan ameye viraştiş. Hetê tirkan de na derbe serkewte; çimkî teslîmbîyayîşî virazîyayî û şorişgerê tirkan vila bîyî. Yê ke vera derbe de xover da û payan ser de vindet tena PKK bî.”
Ewro zî aye xeta xoverdayîşî dewam kena
Sîpanî dewamê qiseykerdişê xo de bale ant xoverdayîşê Kemal Pîr, Hayrî Durmuş, Akîf Yilmaz, Alî Çîçek û yê bînan ser û wina va: “Xoverdayîşê nê embazan şarê kurd werizna payan ser û gandar kerd. Xoverdayîş kilayêk ra ver bi şewatî şî û faşîzmî seba ke vernîya ci bigîro, waşt nê adirî bimirêno. Labelê nêşîna bimirêno. Xoverdayîşê Zîndanê Amedî zîndan ra vejîya û ver bi koyan hîra bî. Dima ra embazanê sey Egîd, Zîlane û Bêrîtanan vet orte. Ewro zî aye xeta xoverdayîşî dewam kena.”
Sîpanî peynîye de wina va: “Eke ma goreyê nê xoverdakaran nêcuyî, o wext yeno manaya ke ma teslîmê faşîzmê 12ê Êlule benî. Şîddet çiqas zêde beno wa bibo, ganî şîddeto şorişger zî goreyê ci zêde bibo. Eke wina nêbo yeno manaya teslîmbîyayîşî. Tena çareserî xoverdayîş o. Ma ancax bi xoverdayîş resenî serkewtişî.”