Hemserekê Komela Edebîyatkarê Kurd aşkera kerdî ke ê qet komela xo de persgirêkê kesayîye ra destûr nêdanê, nika yewîyeya kurdan ra behs yena, no ser zî yewîyeya nuştoxan zî lazim û şert a.
LÊL AMED / AMED
Tirkîya de Hedîseyê 15’ê Temmuze ra pey OHAL ame îlankerdiş la belê OHAL de taybetî sazîyê û şaredarîyê kurd hedef ameyî girewtiş. Nê sazîyan ra yew zî Komelaa Nuştoxan bî. Sazîyê Kurd ke seba ziwanê kurdî xebat kenî têkoşînî ra fek veranêdayê. Seba ziwanê kurdî averberdişî ra Komela Edebîyatkarê Kurd newe ra ronîya û destpê xebatê xo kerdê. Hemserekê Komela Edebîyatkarê Kurd plan û projeyê xo ser o qise kerdê.
Hemserekê Komela Edebîyatkarê Kurd Hogir Berbir vat ke demo ke komela nuştoxan ame girewtiş, nuştoxan vengî de mendê û wina vat: “Çalakîyê seba ziwanî biameynê kerdiş çinê bî. Hewca sazîyêk û siwanêk estbî, nuştoxê ma zey koma wendişê kitaban xebatê xo kerdê la zey nê xebatan îmkan nêda ke heme nuştoxê ma bêrî têhet û xebat bikê. Hewca seba heme nuştoxan sey siwan sazîyêk estbî. Ma 7 nuştox ameyê têhet, sifte ma vat, verdewamîya komela nuştoxan bikê la peynî kanûnê Tirkîya destûr nêdayî ma biakerê. Ma peynî nameyê edebîyatkar de qerar da. Serpirodayişî ra pey ma deklare kerd ke sazîya ma abîya. Heme çapemenî hewca dîyî ke xebera akerdişê komela ma kerd.”
Yewîyeya nuştoxan zî lazim a
Hemserekê Komela Edebîyatkarê Kurd Berbir dîyar kerd ke êdî komela nuştoxan esta û no ser heme nuştox wa bêrî binê komele de xebatanê xo bikê û wina domna: “Demê komela nuştoxan de nakokîyî ke vejyayî û zaf nuştoxê ke ecîz bîyê û dûr mendê veng danê înan la ma qet komela xo de persgirêkê kesayîye ra destûr nêdanê. Ma nika yewîyeya kurdan ra behs kenê, no ser yewîyeya nuştoxan zî lazim a. Ma bêrê têhet xebatê newe ra dest pê bikê. Ma do bi rayîrê konferans, panel û semineran şar û nuştoxan biresnê yewbînan. Şar û nuştoxan bi rehetî derdê xo bîyarê ziwan. Zaf hûmarî de nuştoxê ma neweyî estê, hewca esta ke hetkarî înan bêra dayiş, ma zey komela do înan hetkarî bidê. Hetanê kongreye do ma xebatê xo bi weşî aver bibê, kongre de zî ma do vengê her kesî bikê.”
Qerarê xo endamanê xo reyde bigê
Hewna Hemsereka Komela Edebîyatkarê Kurd Sultan Yaray zî dîyar kerd ke çi heyfo ke peynîya girewtişê sazîyê ke ziwanê kurdî ra xizmet kerdê ra pey sazîyêk nuştoxan bîardînê yew ca çinê bî, no ser zî ê hewca dîyî ke seba nuştoxan komelayêk awan bikê û wina dewam kerd: “Ma sifte vat nameyê komela Yewîyeya Nuştoxan bikê la nêame qebulkerdiş. Ma seba xebatê xo hedra yê, ma newe ra rayberîyêk awan bikê. Ma do rojê ameyoxî de panel, rojê edebîyatî organize bikê, ma her tim wayîrê nuştoxanê xo bivejê. Ma do nuştoxanê xo reyde kombîyayiş bivirazê û fikrê înan bigê. Ma do qet bi serê xo qeraran nêgê. Ma nêwazenê ser bi xo seba heme nuştoxan plan û projeyan bikê, ma do heme qerarê xo bi endam û nuştanê xo reyde bigê.”