Qezaya Şirnex Hezexî de wextê qedexeyê tebervejîyayîşan de, bînaya HDPyî ke hetê hêzê dewlete ra ameybî rijnayîş, newe ra ameye akerdiş. Akerdişê bînaya neweyî bi beşdarbîyayîşê parlamenterê HDPyî û Hemsereka KCDyî Leyla Guvene ame kerdiş. Akerdişî ra ver cinîyan deyîrî vatî û dima ra slogananê ‘Seba Kurdistanî, seba şehîdan, seba cêrzemînanê Cizîrî û seba xoverdayîşê Sûrî Nê’ eştî.
Şar fek têkoşînê xo ra veranêdano
Dima ra mektubê Hemserekê Şaredarîya Hezexî Mehdî Aslan û Nevîn Gîresune ke hepisxaneyan ra erşawitbî, ameyî wendiş. Wendişê mektûban ra dima Parlamentera HDPyî ya Şirnexî Aycan Îrmeze qisey kerde. Îrmeze va ‘ewro coşê şima yê tîya de cewabêko gird da dewlete’ û wina dewam kerde: “Şima bi hawayo baş nîşanê dewlete da ke şarê kurd fek têkoşînê xo ra veranêdano.” Îrmeze dima ra mektûba Parlamenterê Şirnexî Ferhat Encûyî wende.
Ma newe ra akerd
Guvene zî dîyar kerde ke cinîyî rayberîya şorişî kenî û cok ra waşte ke wa cinîyî bêrî aver. Guvene dewamê qiseykerdişê xo de va ‘hepsîyan seba ke tecrîdo ke Rayberê Şarê Kurdî ser de yo bêro wedarnayîş, grevê vêşanîye dayî destpêkerdiş’ û wina domnaye: “Ma tîya ra grevê hepsîyan silam kenî. Nika serrêk û nîme verê ciwanan xoserîye waşt, dewlete bi tanq û topan ameye û ciwanê ma tîya de şehîd kewtî. Têkoşînê înan rayîrê ma roşn keno. Bînaya ma rijnaybî û ma ewro newe ra bînaya xo viraşt. Zaf bicûyênê şarê Hezexî.”
Cewabê ma nê yo
Guvene va ‘hukmatê AKPyî wazeno bi kurdan sere bido ronayîş’ û wina domnaye: “Mehmet Tunç teslîm nêbî. Nêşênî bi kurdan sere bidî ronayîş. Vernîya ma de şansêk esto; cok ra referandûm seba kurdan zaf muhîm o. Ewro heme kurdê dinya werîştî lingan ser û seba referandûmî seferberî îlan kerda. Ma do seba şehîdanê xo yê cêrzemînan de, Dayîka Taybete, Ekîn Wan û Haci Lokman Bîrlîkî vajî nê. Ma do 16ê Nîsane de se ra 90 nê bivejî.”
Qiseykerdişan ra dima bi slogan û tilîlîyan akerdişê bînaye ame kerdiş.
DÎHABER/ŞIRNEX