Nêy mîtîngîy çiqas benê qelebalix, keyfê şaran no 12 serêy cefa dîyê hukimata AKPî ra û hende zî hukimata AKPî ra aciz bîyê. Na coş û kelecan tayinan sersem kena, har kena. Wexto ke har benêy hêrişê der û dor kenêy. Hêrişê HDP kenêy. Bi nê hêrişan wazenêy şarêy ko hevîya xo bi HDPyî arda bitersnêy. 2002’î ra heta ewro AKP tenê hukimat a. Her çiqas name AKP eya la tenê RTE vatiş vano. Tene vatişêy ey pere keno. Se vajo vano gera bi ca bêro. Tenê vatişê ey bêrêy cara cad kenêy. Vatişê şaran qet muhîm nêvînenêy.
Ziwanê ci zî weş geyrenê. Heya eyro no 13 serîyo tim xo kerdo mexdûr. Vecyo duşt şarî. Heme weçînayişan de zî bi ser kewto. Nika zî wazeno xo bikero yew merdim. Bibo serek. Heme hesabêy ey bi no awayî bîy. La kam roj werzen awneno mitînganêy HDPyî ra vîneno bawer keno ke go no xeyalê ci nêşêro sere. A semedî ra roj bi roj vatişêy ci benê vatişê tehrîkkerdişî.
Hêrişêy duşt HDP ey zêdîyay. Lazimo kam nê hêrişan keno yan zî bi deste kamî yenêkerdişî se vejyê werte. No kare hukimatî yo. Wexto ti verpers bidê lazimo ti verpersa xo bi ca biyarê. Nê reyke nê direy hêriş ameykerdiş. Her roj hêriş yenokerdiş. Heta ewro nêzdîyê 70 hêrişî ameyêkerdiş. Nêy hêrişî verê çiman de yenekerdiş. La faîlêy yine nînê diyayiş. An nînê qefelnayiş.
Şarê na erdnîgarî zanêy no karê hewna qirêj (lîşin) bi destê kamî-kaman yenêkerdiş. Kam danokerdiş. Vatişêkê verînan esta: “Wexto dizd û wayirê kêy teydirî de bêy êşkenêy gayî lojinîra (pixêrîra) bivecê teber.”
Sima zî zanêy ke Roboskî de 34 merdimîy zafêreya înan doman bîy bi teyarêyê tirkan amey qetilkerdiş. Ti kesêk heta ewro nêyame girewtiş. Tenê Roboskî nê bi desan domanêy şarî bi fişekanê lejkeran û polîsan amey qetilkerdiş. Qatilêy yînan zî serbest geyrenê.
Şarê na erdnîgarî serra 1925 ra, bi sere wedardişê Şêx Seîdê Kal ra heta ewro no 90 serrêy qatîlanê xo nas keno. Serra 1978 ra heta ewro, no 37 serîyo zî bi reyberîy birêz OCALAN î tekoşîne ko bê hempa dano. Roj bi roj xo newe kerdo. Bi çarêko berz heta ewro amewo. Ewro talibê demokrasîya Tirkîyayî yê û bi no mebestî dekeweno weçînayişî. Roj bi roj bawerî dano şarê Tirkîya. Şarê Tirkîya rê bîyo û beno hêvî. Tenê no tevger êşkeno vernîya zilm, zor, teda, dizdîy û zordarî bigero. Şar bawerî xo pê ardo û ano.
Lazimo ma pêro çi destê ma ra bêro ma bikerime. Ma henî zehf bixebityime. Ma nêy 16 rojêy weçînayişî rê mend zehf bixebityime. Seba nêvacim heeeyf! An nê vacime waaaax! Bi gor “ol” an tay ferzî estêy ti wextêy ceyde nêkerê “qezê” yine ben. La tay ferzî zî “qeza” yînan nêbena. Lazimê ti wextê cêyde bikerêy. “qeza” 7’ê hezîranî zî nêbena!
Nesîp GULTEKÎN