Nê hêrişî bi taybetî Partîya Şaran ya Demokratîke (HDP) û temsîlîyetê bînan yê şarî rê benî. Heta nika hemserekê HDPyî zî tede 10 parlamenterî ameyî tewqîfkerdiş û vera nê tewqîfkerdişan de hem zereyê Tirkîya û hem zî teber de reaksîyonî ameyî nîşandayîş. Derheqê hêrişan de rihayijî qisey kerdî.
Nêyî 12ê êlule daxî nêbî
Îsmet Korkmazo ke wextê derbeya 12ê êlule de Zindanê Amedî de mendbî, va mabênê prosese 12ê êlule û yê AKPyî de cîyayî estî û qiseykerdişê xo wina domna: “AKP polîtîkayanê rezîlan meşneno û bi no hawa rejîmê 12ê êlule ra cîya beno. Çîyê ke AKP û Erdoganî kerd, kesê ke derbeya 12ê êlule viraştî, înan daxî wina nêkerd. Serra 80î de polîtîkayê xo înkarkerdişî ameyênê meşnayîş, la hukmatê AKPyî polîtîkayanê îmhakerdişî meşneno. Çîyê ke wextê AKP û Erdoganî de ameyî cuyayîş, wextê derbeya 12ê êlule de daxî nêameyî cuyayîş. Bi tewqîfkerdişê Demîrtaş û Yuksekdage wazenî kurdan rê sere bidî ronayîş. La şarê kurd verê cu zî sere nêronaybî û nika zî sere nêroneno.”
Çîyo ke yeno cuyayîş faşîzm o
Şaban Çakmakî zî dîyar kerd ke AKP kesê ke sey ci nêfikiryeno wazeno înan çin bikero û wina domna: “Ma tewqîfkerdişê îradeyê şarê kurdî qebûl nêkenî. AKP û Qesre wazenî welat bi dîktatorî îdare bikerî la vera talebanê şarî de mehkumê vîndîkerdişî yî. Heta nika ti kes bi zulm û zextan nêresayo cayêk. Tewqîfkerdişê parlamenteran nîşan dano ke kam wazeno welat de kaos û krîz bivejîyo. Ganî her kes nêyî biveyno. Eke ma çîyê ewroyên rê bêveng bimanî, siba roje beno ke çîyê tayîna giranî biqewimî. Çîyo ke Kurdistan de yeno cuyayîş faşîzm o.”
Ma dawaya xo ra fek veranêdanîme
Şêx Ahmet Yalçinkayayî zî va vera şarê kurd de hêrişê topyekunî dewre de yî û qiseykerdişê xo wina qedêna: “Ewro her çar parçeyê Kurdistanî de kurdî qezencanê xo hîna zaf gird kenî. Nêyî zî bi dayîşê bedelanê giranan game bi game kerd. Kesê ke na rastîye nêwazenî qebûl bikerî, hêrişê kurdan kenî. Kesê kurdan weçînayo, înan tepişenî. Ma rojê ke şerê estene û çinbîyayîşî danî. Bêhuqûqîyê ke yenî cuyayîş, verê çiman de yî. Her kes nînan baş vîneno û zano. Heme dinya nînan temaşe keno. La şarê kurd nêşkeno temaşe bikero û yewna seserre sey kole bicuyo. Eşkenî ma û kesê ke ma weçînayo tewqîf bikerî, ma dewaya xo ra fek veranêdanî û nêşkenî fek bi ma bidî veradayîş.”
ANF / RIHA / HASAN YOLDAŞ