Endamê Komîteya Caardişî yê KCKyî Duran Kalkanî keyepelê yps-onlîne.com rê qisey kerde û derheqê xoverdayîşê xoserîya demokratîke ya şarê kurdî de vînayîşê xo ard ziwan.
Endamê Komîteya Caardişî yê KCKyî Kalkanî va ‘ez bi wesîleya serra neweyî, sifteyîn Hemserekê Meclîsê Şarî yê Cizîrî Mehmet Tunç, Asya Yuksele û Sereka Meclîsê Şarî Pakîze Nayire û heme şehîdanê xoserî bi rêz û hurmet vîr ana’ û qiseykerdişê xo wina domna: “Ma do tim rayîrê înan de şêrî û înan reyde îftixar bikerî.”
Şarê ma têkoşînê azadî ard duştê serkewtişî
Kalkanî dewamê qiseykerdişê xo de va ‘Têkoşîno ke bi nameyê Xoverdayîşê Xoserîya Demokratîke aver şî, planê rijnayîşî yê faşîzmê AKP û MHPyî veng vet û eynî wextî de têkoşînî ard duştê serkewtişî. Têkoşîno ke serra 2016 de deşte, ko, bajaran de şewe û roje bi xoverdayîşê Rayberî, şar, gerîla û sîyaseto demokratîk ame nîşandayîş do serra 2017 de ma biresno serkewtişî. Eke ma serranê 2015 û 2016 ra ders bivejî, o wext ma eşkenî bi tarz, ûslup û tempoya raşte serra 2017 de serbikewî.”
Bedelê ci zaf giran o
Kalkanî bale ant serkewtiş û şaşîyê xoverdayîşê xoserî û wina va: “Her çiqas ke şaşî û kêmanîya xoverdayîşê Sûr û Cizîrî estbî zî, nê xoverdayîşê tarîxî yî. Nê xoverdayîşî hem seba estena kurdan û hem zî îdîa, ruh û îradeya kurdan temsîl kerdî. Heto bîn ra nê xoverdayîşî mîyanê xo de dersanê dewlemendan hewênenî. Ganî merdim na dewlemendî bivîno. Qet şik çin o ke bedelê ci giran o. Yanî merdim nêeşkeno vajo do bi tesilî netîce wina bibîyêne. Netîce eşkîyayêne biameyêne bedilnayîş. Labelê netîceyêko winasî vejîya orte.”
Ma zerrîye ra bawer kenî
Kalkanî qiseykerdişê xo de va qala nizdîbîyayîşê têkoşînî kerd û wina dewam kerd: “Ganî şarê kurd bi hawayo rexne û xorexnekerdiş nizdîyê têkoşînê 2017î bibo. Bitaybetî hêzê xopawitişî, hêzê YPSyî do rexne û xorexnekerdişêko gird nizdî bibî û hîna zaf pratîkî muhakeme bikerî. Ma bi zerrîye ra bawer kenî ke do xoverdayîşê 2017, xoverdayîşê xoserîya demokratîke biresno serkewtişî.”
Kalkanî peynîya qiseykerdişê xo de wina va: “Ciwan û şervanê kurdan wayîrê cesaret, îrade, zanayîş û fedakarî yî. Çîyo ke maneno xorexnekerdişêko raşt, ders girewtiş û hetê tarz, ûslup, taktîk û tempo de xo rêxistinkerdiş û xo îdarekerdiş o. Ma sey şar û tevger bawer kenî ke ma do nêyî bikerî. Na çarçewa de ma heme hêzê ke têkoşîn danî rê û xoverdakarê xoverdayîşê xoserîye rê serkewtiş wazenî. Ma do bi şopa şehîdan de şêrî û bi no hawa serbikewî.”
ANF / BRUKSEL