Federesyonê Komeleyê Dersimî qedexekerdişê Festîvala 17. ya Kultur û Xoza yê Munzurî rê nêrazîbîyayîş damûsna û aşkere kerd ke, iyê dê mavêna 27 û 30'ê Temmuze de zey ke Festîvala 17. ya Kultur û Xoza yê Munzurî bîro bimbarekkerdiş dê Dersim de bê. DDF vera qedexeyan vengdayîşê wayîrvejyayîşê festîvale kerd.
Sazî û rêxistinê Dersim wextekê derg o ke amadekarîyê Festîvala 17. ya Kultur û Xoza yê Munzurî kenê. La Walîtîya Dersimî derheqê festîvale de qerarê qedexeyî girewte. Federesyonê Komeleyê Dersimî bi îzahatekê qedexe protesto kerdî. Îzahat Şaxê ÎHD yê Stenbolî de hetê endamê komîteyê hunerî yê DDF Vedat Baranî amê wendiş.
‘Walî sazî muxatab nêgirot’
Baranî vist vîrî ke zey vizêr, ewro zî dewlet û hukmat şarê Dersimî rê eyb kena û wina va: “Dewlet bi na helwesta xo vera Dersimijê ke vilayê çar hetanê dinya biyê, qirkerdiş virazena, destûr nêdana ke ê bi raya kulturî bîrê têhet. Walî bi behaneyê OHALî festîval keno qedexe, bi nayî ra sazîyê ke festîval organîze kenê, muxatan nînê girewtiş.”
‘Qedexe zilm o’
Endamê komîteyê hunerî yê DDF Vedat Baranî aşkere kerd ke qedexe seba Dersim zilm o û ê no zilmî red kenê. Baranî bi nê vatenan vengê wayîrvetişê festîval da: “Dersimijê ke metropolanê Tirkîye de ciwîyenê û dostê ma, ganî qedexeyan nêsilasnê. Rixmê qedexe, ma dê mavêna 27 û 30'ê Temmuze de zey ke Festîvala 17. ya Kultur û Xoza yê Munzurî bîro bimbarekkerdiş, ma dê Dersim de bê. Ma dê jîyaranê xo yê bimbarek zîyaret bikerê û çirayanê xo wekerê û pêravanê Mûnzûrî de helbestanê xo biwanê.”
STENBOL