Taxa Gazî ke vêşêrê ci elewî û kurdan ra pê yeno, nika çarçeweya Projeyê Otoyolî yê Marmaraya Vakurî de rijîyayîşî reyde rî bi rî yo. Bitaybetî taxê Zubeyde Hanim, Yunus Emre û 50. Yil hedef de yî. Babete ser o welatîyî qisey kerdî.
Welatîjan ra Huseyîn Çinaro ke 1985 ra nata taxe de ronîşeno, va ‘ma qerardar î ke taxa xo nêdî rijnayîş’ û qiseykerdişê xo wina domna: “Heme zehmetîyê taxe ma ant û hem çîyê taxe ma bi xo kerd. Heta nika dewlete seba çîyêk zî nêkerd. 31 serrî yo ke ez tîya de ya û ez destûr nêdana ke keda mi hetê dewlete ra bêra çinkerdiş.”
Cinîya Huseyîn Çinarî Gulay Çinare zî derheqê babete de va ‘ez mirena la keyeyê xo nêteriknena’ û va: “Ma keyeyê xo 31 serran de temam kerd û her ke vengê wesayîtî yeno, ez vana qey seba rijnayîşî ameyî. Ez şewe nêşkena rakewa. Ez nêşona cayêk, wazenî wa canê mi bigirî.”
Wazenê taxanê ma çin bikerê
Zehra Gozutoka ke 1984î ra nata taxe de ronîşena, va: “Heme çîyê mi, keyeyê mi yo. Ma zaf zehmetî ant û zaf kede da. Mi serra 2009 de na doze rê îtîraz kerd û mi o wext qezenc kerdbî. Wazenî bi nê projeyî taxanê elewî û kurdan çin bikerî. Ma do destûr nêdî ke taxe bêro rijnayîş.”
Sermînaye Arslane zî va ‘ma keyeyê xo bi destanê xo awan kerd’ û wina domnaye: “Helbuk ma rê sozê tapuyî amebî dayîş. Ma do heta peynî heqê xo bipawî.” Sakîne Yurttaşe zî va bêxera keyeyê mi, sewbîna çîyê mi esto’ û dewamê qiseykerdişê xo de dîyar kerd ke ma qey wijdan û merhametê înan çin o?
Melahat Çatalciye ke hetê lajê xo de manena zî wina va: “Eke keyeyî bêrî rijnayîş, ma do se bikerî, şêrî kura? Roja ke mêrdeyê mi merdo ra nata ez hetê lajê xo de manena. No senî merdimîye yo.”
Haydar Doganî zî bale ant ser îstîmlaqkerdişî û va ‘ma do destûr nêdî rijnayîşî û heta peynî xover bidî.’
ZEYNEP KURAY / ANF / STENBOL