Partîyê ke amadekarîya referandûmî kenî, înan ra yewe zî Partîya Kede (EMEP) ya. Endama EMEPî ya Wanî Evîn Turgute derheqê referandûmî de qisey kerde. Evîn Turgute va ‘ma do seba azadîya şaran vajî nê’ û wina dewam kerde: “Hukmatê AKPyî netîceyê weçînayîşê 7ê Hezîrane çinî hesibna û reyêka bîne weçînayîş viraşt. Tirkîya de ti manaya viraştişê weçînayîşan nêmenda. AKP qayûm tayînê şaredarîyan keno û şaredarîyan dagîr keno. Tirkîya de demokrasî nêmenda.”
Ma do baş bixebetyî
Turgute bale ante ser tehdîtê ke hetê Hetkarê Serekwezîrî Numan Kurtulmuşî û wina va: “Wexto ke mi nê tehdîtî eşnawitî, mi rê xerîb nêame. Wextê weçînayîşê 7ê Hezîrane de zî amadekarîya nêyî ameyêne kerdiş. Ma do seba ke no zîhnîyet qanûno bingeyî de nêro bicakerdiş, vajî ‘nê’. Ma destûr nêdanî ke faşîzm bibo hakim. Ma do bi moralêko gird ‘nê’yî rêxistine bikerî. Heta ke ma dest ra bêro ma do sîstemê Serekkomarî bi şarî bidî famkerdiş.”
ŞÛJIN/WAN