Roniştişê dawa komkiştişê Pirsûsî bê versûcan amê vînayen. Dirbetinanê Pirsûsî nay rê nêrazîbîyayîş damûsna û dîyar kerdî ke ê dê na dawa ra fek veranêdê. Gazîyan vistî vîr ke seba ke ê dewlet û hikûmet ra hesab pers bikerê şiyê Pirsûs û vatî, ‘Heta ke kerdoxan ra hesab nîro persayîş, têkoşîna înan do biramo.
20'ê Tîrmeha 2015’î de seba newe ra ronayîşê Kobanî, pêşengîya Federasyonê Komeleyê Gencanê Sosyalîst (SGDF) koma ke baxçeyê Merkezê Kultur ê Amara yê Pirsûs de amey têhet, raştê hêrîşa xokiştoxê DAIŞ, Abdurrahman Alagoz amey. Netîceyê hêrişî de 33 kesan weşîya xo kerd vinî û 100 ra vêşêr kes zî bî dirbetin.
21 aşman ra dima, roniştişa yewîn yê Komkiştena Pirsûs 5. Mehkemeya Cezayê Giran ê Riha de amê vînayen. Roniştiş bê versûcan amê vînayen. Keyeyanê kesê ke komkişten de weşîya xo kerdî vinî û şahîdanê komkişten nayî rê nêrazîbîyayîş damûsnay û aşkere kerdî ke têkoşîna înan ya seba edaletî d o biramo.
‘Seba xo ewleyî girewtî’
Keynaya Îsmet Şeker ke teqînayîşî de weşîya xo kerd vinî, Yagmur Şeker ard ziwan ke ê dê hesabê pîyê xo û 33 gencan bipersê û wina va: “Senî ke 21 aşmîyo ma têkoşîn danê, neyra tepya zî têkoşîna ma do dewam bikero. Ez a heta peynî na dawa taqîp bikera.” Şeker, îşaret kerd ke wextê roniştişê yewîn de lejkeran çormeyê Kampusa Saziyê Înfaza Ceza yê Riha girot û va, “Wexto ke pîyê mi ê amey tiya, tedbîrê tîvarî nêamey girewten. Tedbîrê ke wextê roniştişê dawa de amey girewten zî seba ma nêbî, seba xo ê tedbîran girewtî.”
‘Ma dê edalet qezenc bikerê’
Sezgîn Dag ke Komkiştena Pirsûs ra dirbetin xelesîya zî da zonayen ke omidê ey dawa ra çin o. Dagî dîyar kerd ke qerarê dawa verî ra ameyo dayen û wina dewam kerd: “La rixmê her çî zî do têkoşîna ma dewam bikero.” Gazîya bi nameyê Gokçe Çetin zî wina va: "Ez zî gazîyanê Pirsûs ra jû ya û eynî wextî de şahîda qetlîama zî. 21 aşmî ser ra vîyarnay. La roniştiş bû versûcan nîno qebûlkerden. Viraştişê roniştişê yewîn seba ma zaf muhîm o. Ez hina omid kena ke, bi têkoşîn do tayî çî bivûrnîyê. Ê dê edalet nêdê ma, ma dê bi xo bivistnê dest.”
‘Ma seba hesabpersayîşî tîya de yê’
Yasin Can o ke komkişten de bi dirbetin zî dîyar kerd ke o gaziyekê Pirsûsî yo welatperwer o. Canî zî aşkere kerd ke bawerîya ey bi mehkeme û hiqûqa înan çinya û wina va: “Rixmo ke ma zanê do netîceyekê pozîtîf nêvejyo zî, la reyna zî ma dê na dawa ra fek veranêdê. Wa rind bizanê ke, ma dê qetî peyser gam nêerzê. Heta ke mesûlî nîrê mehkemakerden û ceza ci rê nîro birnayen, ma dê taqîpkarê na dawa bê. Ma seba ke dewlet û hikûmet ra hesab pers bikerê, ameyê tîya.”
Dirbetê Pirsûs Kenan Yildizer zî vist vîrî ke o bi ko zî şahidê komkiştena ke verîya 21 aşman bi destegê dewlet virazîya yo. Yildizerî aşkere kerd ke înan roniştiş de gilîyê xo yê derheqê sermîyananê dewlet û çeteyê DAIŞ'î de ardî ziwan û bi nê vatenan qiseyanê xo qedêna: “seba ke na dawa bi adilane netîce bibo, ma dê fek ci ra nêviradê. Ganî omidê ma bibê. Ma dê pêropîya taqîpkarê na dawa bê.
DÎHABER/RIHA