Bananê xo terk nêkenime
Welatij Reşît Kartal (70) bertek nîşanê polîtîkayê rijnayîş û koçkerdişî da û dîyar kerd ke ê bi tesilî bananê xo terk nêkenî. Kartal wina vat: “Ewta herraya pîyê min a, herra Erdoganî nîya. Min lete bi lete bikerî zî ez banê xo terk nêkena.” Hetanî saetê şewe Kartal bêmîyan seba newe ra înşakerdişî xebityeno. Kartal mîyanê molozan de brîket û kerrayî ke saxlam mendî reyde xebatê înşakerdişî domneno.
Wa herkes bîro
Kartal wina dewam kerd: “Ma bi 12 nufisî ewta de mendînî. Banê min birijnî, biveşnî ez do newe ra înşa bikera û ez veng dana her kesî wa bêrî Geverî.”Taxa Ormanî ra Îlhan Onay zî aşkera kerd ke dijî polîtîkayê rijnayîşî, newe ra kargehê xo înşa keno. Onay ciresna ke çi heyf ke ban û kargehê ci veşnayî û talan kerdî, ê zî bi îmkananê xo malzemeyê înşaetî ke girewtî reyde ban û kargehê xo newe do înşa kenî û wina peynî kerd: “Ê do çiqas birijnî ez do newe ra do înşa bikera. Ma fek herraya xo ra veranêdanî, Homa wa no zilmî qebul nêkero.”
DÎHA/COLEMÊRG