Teşebusê derbe ra dima Tirkîya de rewşa îstîsnayî ameybî îlankerdiş û dima ra bi Qerarnameyê Hukmê Qanûnî bi hezaran kesî karî ra ameybî îxraçkerdiş. Mîyanê nê kesan de akademîsyenê ke unîversîteyan de xebetîyayêne zî estbî. Babete ser o akademîsyenê cinîyî qisey kerdî.
Unîversîteyê Anqara ra Doç. Dr. Gulseren Adakliye va ‘ti eleqeya karî ra îxraçbîyayîşê mi çi FETO û çi zî rêxistinêko bîn reyde çin a û her kes zî nêyî baş zano’ û wina domnaye: “Her kes seba ke îqtîdarê xo bigiro bin temînatî, nê prosesî goreyê xo xebetneno. Ma do têkoşînê xo bidomnî.
Hedef bêvengkerdiş o
Unîversîteyê Anqara ra Dr. Îlkay Karaye zî wina va: “Ez îdîaya endamîya FETO qebul nêkena. Na kayêka zaf xirabin a. Rektor seba ke vera ci de reaksîyonî zêde nêbî, parçe parçe lîsteya xo aşkere keno.”
Unîversîteyê Anqara ra Wezîfedara Cigêrayîşî Aysun Gezene va ‘cayê ke fikrê muxalîf û rexnekerdişî pawenî de cayê polîsan çin o’ û wina dewam kerd: “Rektor Erkan Îbîşî goreyê fermanê îqtîdarî hereket kerd û bi no hawa erjê unîversîteyî rijna. Êdî merdim nêeşkeno Unîversîteyê Anqara ra vajo unîversîte.”
Ma bedelê ci danî
Unîversîteyê Anqara ra Prof. Dr. Işil Unale zî va ‘ez zî akademîsyenê ke îmze eştbî vilaweka aştî, înan ra yew a’ û wina domnaye: “Na vilaweke vera çîyê ke cografyaya kurdan de qewimîyayêne de seba hişyarkerdişê dewlete amebî nuştiş. Ma nika bedelê ci danî. Ma do peyser biagêrî unîversîteyanê xo.”
Unîversîteyê Anqara ra Doç. Dr. Sureyya Karacabeye zî wina va: “Ma do merdimê ke wijdanê înan rehet o û her tim hewl dayî ke erjê merdimîye bipawî, wina bêrî şinasnayîş. Wa yê ke teberê ma de yî bifikirî. Bi hezaran karker û kedkarî zî karî ra ameyî îxraçkerdiş. Ma înan ra cîyayêr nîyî. Ez do biba vengê înan.”
Muxalîfan îxraç kenî
Unîversîteyê Anqara ra Wezîfedara Cigêrayîşî Esra Dabagciye dîyar kerde ke bi OHAL tayê firsendî kewtî destê înan û bi no hawa wazenî vengê muxalîfan bibirnî la ez do mîyanê prosesê bêhuqûqî de ca bigira.
Unîversîteyê Nîgde ra Wezîfedara Cigêrayîşî Fatma Gul Eryildize va seba ke ma va aştî, ma terorîst îlan kerdî û ez do prosesê huqûqî bidomna.
Unîversîteyê Munzurî ra Wezîfedara Cigêrayîşî Emîne Sevîme veng daye mamosta, wendekar û xebatakaran û wina va: “Ganî ma heme xo rêxistine bikerî, sewbîna alternatîfê ma çin o.”
Estena rûmetî
Unîversîteyê Ege ra Prof. Dr. Zerrîn Şahîne zî wexto ke karî ra îxraç bîbî, xo dima notêk verdaybî û not de wina amebî vatiş: “Ganî mi ewro ezmûnê fînalî biviraştêne, la KHKyî mi ra ver kewt hereket û persêko giran rona wendekaran ver. Seba mi Fakulte de bîyayîş yan zî nêbîyayîş çîyêko muhîm nîyo. Ez şima rê serkewtiş wazena.”
Unîversîteyê Konya ra Wezîfedara Cigêrayîşî Nurîye Gulmene zî 2 aşmî yo ke Anqara de bi vatişê ‘ez karê xo peyser wazena’ xover dana, wina va: “Ma do heta peynî têkoşînê xo bidomnî.”
Unîversîteyê Anqara ra Doç Dr. Sevîlay Çelenke va ‘ma do peyser biagerî’.
Tewr peynî Unîversîteyê ODTUye ra Wezîfedara Cigêrayîşî Denîze Kîmyone zî wina va: “Mi nê 3 qelemî girewtî hetê xo, ez do fek nê qelem û xoverdayîşî ra veranêda. Ma do qezenç bikerî.”
ŞÛJIN / ENQERA