Parlamenterê HDP û endamê Heyeta Îmrali Sirri Sureyya Onder ke serragêrê Komploya Mîyanneteweyî de ANF rê qisey kerd, da zonayen ke birnayişê muzakereyan Komploya Mîyanneteweyî ra cîya nîyo.
Onder’î vist vîrî ke Ocalan bi vetişê Sûrîye û şîyayîşê Ewropa ra pîya meşa haştî û sîyaseta demokratîk da dest pakerdiş û dîyar kerd ke na jûyî quwetanê mîyanneteweyî hêrs kerd.
Parlamenter Onder’î ard zon ke komplo nêşkeno na meşa haştî manî bikero û va, “Zey keseko ke 3 serrî bi Birêz Ocalan’î ra xebetyaya, zana ke na meşa haştî, rixmê pêrokîn manîkerdişan do bireso fînala têdûştî û serbestî. Ma dê pêro pîya serbikewê.”
Sirri Sureyya Onder’î vatişê Serekwezîrê o wextî Bulent Ecevîtî ke vatbî ‘Çira Amerîka Apo teslîmê ma kerd, mi fam nêkerd’ vist vîrî û wina va: “Pêrokîn kiştê Komploya Mîyanneteweyî mîyanê na vatişî de nimite yê, bi vetişê Sûrîye û şîyayîşê Ewropa ra komplo ame pûçkerdiş û raya sîyaseta demokratîk û meşa haştî da dest pakerdiş.”
Ma dê kayanê înan yê referandûmî pûç bikerê
Onder’î hayr ant sîyaseta heremî ser û aşkere kerd ke statukoyê bingeyîn ê heremî, ser dişmenî û nefreta kurdan rameno. Endamê Heyeta Îmrali Sirri Sureyya Onder’î aşkere kerd ke Ocalan Îmrali de zî seba sîyaseta demokratîk û haştî înisîyatîfê gird girot û no îradeyî bi şaranê Tirkîye, yê heremî û dinya rê da qebûlkerdiş. Onder’î dîyar kerd ke nêbeno ke birnayişê muzakereyan Komploya Mîyanneteweyî ra cîya bîro hesibnayiş.
Onder’î cewab da spekulasyonanê ke zey 'Ocalan’î Sîstema Serekîye rê vato ‘ya’, û bi nê vatişan qiseyanê xo qedêna: “Nê vatişî parçeyekê kayanê zexelî yê. Tîya de bi hawayekê zexel (sinsî) wazenê boykotî mîyanê şarê kurd de rêxistin bikerê. Eke bişerê hewl danê ke vengê ‘ya’ bidê dayiş. Eke nayî nêşkîyê zî hewl danê ke şarê kurd sindoqan ra biancê. Ma dê nê kayan pûç bikerê û vernîya înan bigîrê.
ZEYNEP KÛRAY / STENBOL