Reyna şaredarîyan rê qayûmî ameyî tayînkerdiş û hemserekê şaredarîyan erzîyayî hepisxaneyan. Tewr peynî şaredarîyanê Wan, Sêrt û Mêrdînî rê zî qayûmî ameyî tayînkerdiş û hemserekê şaredarîyan ameyî tepiştiş.
No şewdir bi qerarê Wezaretîya Karê Zereyî Hemserekê Şaredarîya Bajarê Girdî yê Mêrdînî Ahmet Turk zî wezîfe ra ame girewtiş û herinda ci de Walîyê Mêrdînî Mustafa Yaman sey qayûm ame tayînkerdiş. Şaredarîye bi wesayîtê zirxinan girîya bin abluqayî. Babete ser o Hemserekê Şaredarîya Bajarê Girdî yê Mêrdînî Ahmet Turk qisey kerd.
Bedelê ci çi beno wa bibo ma do xover bidî
Turkî qiseykerdişê xo de qalê hêriş û faşîzmê ke serranê 80 û 90î de ameyî xebetnayîş kerd û wina domna: “Sernêkewenî û nêşkenî bi ma. O wext ma senî xover da, ewro zî ma sere nêronenî. Hukmatê AKP û Qesre wazenî şar de tesîrê şokî virazî û bi no hawa şarî teslîm bigîrî. La belê şar nê hêriş û faşîzmî vera sere nêroneno û şar do bi rêxistina xo nê hêrişan veng bivejo.”
Hemserek Turkî bale ant proseso giran ser û qiseykerdişê xo wina qedêna: “Ma do bi prosesê giranî reyde rî bi rî yî. Bedelê ci çi beno wa bibo, ma do têkoşînê xo bidomnî û xoverdayîşê xo bidomnî.”
MÊRDÎN / SEDAT SUR / ANF