Endamanê Senatoyê Fransa û Meclîsê Neteweyî yê Fransa, endamanê Parlamentoyê Ewropa morê xo da binê îzehetêko hempar ro. Îzehet de 30 cinîyan Kurdanê Rojawanî rê silam erşawit ke seba cinîyan ê dinya têkoşîn danê.
Cinîyan îzehetê xo de vato ‘Ma sey parlamenteranê Fransa pare kenê ke piştîdayîşêko xurt danê cinîyanê Kurdan ê Rojawanî yê ke seba heq û komelêko têduşt şer kenê’ û wina dewam kerdo: “Înan seba menfaatê dinya şer kerdî ke ma zî înan pawenê. Artêşa Tirkîya ke tepîya ancîyayîşê Amerîka ra hêz girewt, bi hewayêkê namerdî hêrişê şaranê Rojawanî kerd.”
Îzehet de ameyo vatene ke ‘tekoşînê seba komelêko têdûşt têkoşînêko yewîn nîyo ke nê cinîyî oxirê ci de domnenî’ û wina domîyayo: “Zafaneyê înan vera hêzanê îdeolojîkan û leşkerî yê DAÎŞî de destê xo eştî sîlehan. Hêrişê Tirkan kerd ke bi seyan endamanê DAÎŞî serbest bibê ke no zî DAÎŞî newe ra ganî bikero.”
Îzehet de ca dîyayo vatişê cinîyanê Rojawanî yê ‘Ma bi bedelan şorişê cinîye pawenê. Ma têkoşînê xo reyde ser nameyê cinîyanê dinya şonê’ û wina vato: “Ma zî naye zanenê û mînetdarê înan ê. Ma Komara Fransa ra zerrîye ra înan silam kenê. Binê şert û mercanê şerî de ma wazenê ke hêrişê Tirkîyayo ke DAÎŞ do newe ra ganî bikero, bêro vindertene û Fransa û Ewropa ra wazenê ke nê hêrişan şermezar bikerê. Ma veng danê Neteweyê Yewbîyayeyî ke wa herême de firayîşê teyarayan bêro qedexekerdene û seba naye zî hêzêkê mîyanneteweyî tê bigêro. Ma veng danê Fransa û Ewropa ke verba Tirkîya ambargoyanê sîyasî û malî yê giranan bîyarê ca.”
PARÎS