Prosesê referandûmî roja destpêke ra nata bi munaqeşe û xebatan domîyeno. Heta nika xeylê hetî derheqê referandûmî de fikrê xo aşkere kerdî. Cepheyo ke vano nê, her roje bi beşdarbîyayîşê hetanê cîya-cîyayan her ke şono hîra beno. Nê hetan ra yewe zî elewî yî. Seba ke mîyanê nê bedilnayîşê qanûno bingeyî de seba elewîyan çîyêk çin o, elewîyî zî vanî nê.
Hemserekê Komeleyê Elewîyê Demokratîke (DAD) derheqê referandûmo ke do 16ê Nîsane de bêro viraştiş de fikir û vînayîşê xo ardî ziwan û seba ke reya ‘nê’yî bidî veng dayî heme elewîyan.
Dewlete elewîyan ra tersena
Hemsereka DADî ya Şûbeya Tuzlaya Stenbolî Fazîle Elsevere va ‘eke Sîstemê Serekî bêro, o wext do problemê cîddî yê cinîyan bivejyî’ û qiseykerdişê xo wina domnaye: “Cok ra ganî ma cinîyê elewîyî vera nêyî de veng bivejî. Dewlete elewîyan ra tersena, tewr zaf zî cinîyan ra tersena. Eke Sîstemê Serekî bêro, o wext do kultur, bawerî û ziwanê ma vînî bibo. Ganî ma nê tedayan ra nêtersî û sere de cinîyê elewîyî û heme cinîyî vajî nê.”
Hemserekê DADî yê Şûbeya Stenbolî Bulent Felekogluyo ke mekanê Xizirî Gola Çetu ra veng da şarî, wina va: “Fîravunêk wazeno îqtîdarê xo mende bikero. Ma vanî her Fîravunî rê Musayêk, her Nemrûdî rê zî Îbrahîmêk lazim o. No proses seba şarê Kurdistanî û Tirkîya astengkerdişê îqtîdarê Fîravunî yo û ma wazenî netîce de proseso ke şar xo bi xo qerarê xo bido, wa bêro awankerdiş. Ya ma do na ameyoxe asteng bikerî û karêko xêrin bikerî yan zî no rejîmo dîkta do bi serran xo bido domnayîş.”
Vera neheqî de ‘Nê’
Felekogluyî dewamê qiseykerdişê xo de va ‘ganî ma heme sazî û dezgehê elewîyan bêrî têhet û nê zîhnîyetê Nemrudî ra vajî nê’ û qiseykerdişê xo wina domna: “Ma mecbûr î ke vera nêyî de vengêk bivejî. Eke wina nêbo vernîya ma de zulm esto. Ganî ma bi ziwanêko ortax vajî nê. Bi no hawa ma bawer î ke her elewî do vera neheqî de bi hawayêko bihêz vajo nê.”
Ca nêdîya kurd û elewîyan
Hemserekê DADî yê Şûbeya Avcilarî yê Stenbolî Ozgur Bulanî zî va ‘zulmo ke 7ê Hezîrane ra nata dewam keno, esto’ û qiseykerdişê xo wina domna: “Serekê Şaredarîyan û hemserekê HDPyî yê bajaran heme tewqîf bîyî. Ma do vera nê tedayan de vengê xo bivejî. Xizir Paşa zîhnîyetê Nemrudî pak kerd.”
Bulanî dewamê qiseykerdişê xo de wina va: “Qanûno bingeyî de ca nêdîya kurd û elewîyan. Qanûno bingeyî yo newe bi temamî rejîmê dîktatorî yo. No qanûno bingeyî de veng û rengê ma çin o û no qanûno bingeyî yê qanûno bingeyî yê 82î ra hîna zehmetin o. Ma sey heme sazî û dezgehê elewîyan vanî ‘nê’. Ma vera zulmî de sere nêronenî. Ma do heme dezgehê demokratîke bêrî têhet û têkoşîn bidî. Ganî heme rengî pîya qanûno bingeyîyo ke azadî û aştîye tede esto, bêro amadekerdiş. Wa Xizir hetkarîya şima bikero.”
DÎHABER / DÊRSIM