Şirnex de wextê qedexeyê tebervejîyayîşê kuçeyan de se ra 70ê banan ameyî rijnayene û awanîyê ke hetê TOKÎ ra ameyî viraştene zî hema nêameyê teslîm kerdene. Bêxera banê ke zirar dîbî, yê mende bî zî ameyî rijnayene. Seba nê taxan qerarê ‘waro rîskin’ ame vetene û seba banê mendî zî qerarê rijnayîşî ame girewtene.
Girewtişê qerarî ra dima Wezaretê Dorme û Bajarvanî welatîyan gêrayo û wext dayo welatîyan. Ame zanayene ke wezaretî hîn keyeyan ra vato ‘eke şima nêwazenê keyeyê şima bêro rijnayene, pereyo ke ma seba kîra û hacetan dayo şima, reyna bidê ma’. Cizîr de zî eynî çî amebî kerdene.
Hemwelatîyan da zanayene ke ê do muracatê rayîrê huqûqî bide. Hemwelatîyê taxe Nurê Îdîne dîyar kerde ke seba banê înan nêrê rijnayene fek heme waştişanê xo ra vera dayê û ê nêwazenê dewlete ra pere bigirê.
‘Ma 7 aşmî çadire de mendî’
Nurê qiseykerdişê xo de wina va: “Pêrodayîşan de ma mecbur mendî vejîyê. Ma 7 aşmî çadire de mendî. Ma 4 keyeyî çadire de cuyayî. Domanê ma her roje herre de mendêne û nêweş kewtî. Kepçeyan keyeyê ma derb kerdbî. Yê ke wezaret ra ameyî raporê zirarî girewtî, ma tena 6 hezar pereyê hacetê elektîrîkî girewt. Dima ra ma banê xo viraşt. Hewteyo peyên de ma hişyar kerdî ke ma keye ra bivejîyê. Ma zî va ‘ma nêvejîyênê’. Mêrdeyê mi şi ofîsê îrtîbatî. Înan zî vato ‘fek 75 hezar TL pereyo ke seba zirarî ameyo birnayene ra bidê do keyeyê şima nêro rijnayene’. Ma dewlete ra çîyêk nêwazenê.”
JINNEWS / ŞIRNEX