MAHÎR YILMAZKAYA / ANF / BEHDÎNAN
Weçînayîşê 7ê Hezîrane ra dima konseptêkî bi hawayo topyekun îmhakerdişî erzîyabî dewre û Amed, Pirsûs û Anqara de qetlîyamî ameybî viraştiş. Nînan ra Qetlîyamê Anqara 10ê Teşrîna Verêna 2015î de virazîya û netîceyê ci de goreyê hûmara fermî 102 kesî ameybî qetilkerdiş û bi seyan kesî zî birîndar bîybî.
Vizêr Serrgêra Qetlîyamê Anqara bî. Babete ser o Endamê Komîteya Perwerdeyî ya PKKyî Nurettîn Demîrtaşî qisey kerd.
AKP hetkarîya DAIŞî kerd
Endamê Komîteya Perwerdeyî ya PKKyî Demîrtaşî destpêkê qiseykerdişê xo de keyeyanê kesê ke Qetlîyamanê Amed, Pirsûs û Anqara de merdî rê serweşîye waşt û wina va: “Hetê herkesî ra yeno zanayîş ke AKP û Erdogan bi nê qetlîyaman waştî se bikerî. O wext seba ke nê qetlîyamî bêrî vindarnayîş, bi her hawayî têkoşîn ame dayîş. AKP nê hêrişan hewaleyê DAIŞî kerd. Labelê herkesî dî ke yê ke DAIŞî har kerd Erdogan û AKP bî. Xora yê ke qetlîyamê Amed, Pirsûs û Anqara plan û organîze kerd AKP û Erdogan bî. Qetlîyamî ra dima tayê kesan hêvî kerdêne ke îstîfayî bêrî kerdiş. Labelê no şaş bî; çimkî yê ke plan kerdbî do senî îstîfa bikerdêne. Xora wezîrê ê wextî dîyar kerd ke kêmanîya înan çin a. Helbûk o wext medyaya komelkî ser de xeylê xeberê winasî estbî. Dim ara AKP û Erdoganî Tirkîya û Kurdistan de pêlê faşîzmî da destpêkerdiş.”
Adirdbes ame îlankerdiş
Demîrtaşî va ‘yeno zanayîş ke îqtîdarê AKP û Erdoganî Kombîyayîşê MGKyî yê 30ê Teşrîna verêne ya 2014î de qerarê neweyî girewtî’ û wina domna: “Bi nê qeraran hewl da ke mudaxaleyê Sûrîye û Rojawanî bikero. Vakurê Kurdistanî de zî hetê leşkerî, sîyasî û komelkî de hewl da ke Tevgerê Azadîye tasfîye bikero. Na çarçewa de Planê Rijnayîşî erzîya dewre. Çimkî xoverdayîşanê Gezî, Kobanê û weçînayîşê 7ê Hezîrane de serkewtişê girdî ameybî qezençkerdiş. AKP û Erdoganî waşt bi nê qetlîyaman bivindarno. O wext PKK hewl dayêne ke weçînayîş prosesêko bêpêrodayîş de derbaz bibo û cok ra do adirbes îlan bikerdêne. Labelê AKP û Erdoganî vernîya adirbestî girewtî.”
Faşîzm bi weçînayîş têk nêşono
Demîrtaşî dîyar kerd ke Tirkîya de qala rejîmêko faşîst yeno kerdiş û wina va: “Heta nika rejîmê faşîstî qet bi sindoq û weçînayîşî têk nêşîyo. Vera rejîmanê faşîstan de bi her hawayî têkoşîn meşrû yo. Ewro Kurdistan de xoverdayîşêkî gird yê gerîlayan esto û no zî hêvîyêka girde dano şarî. Herçiqas ke xoverdayîşo ke yeno nîşandayîş bes nêbo, reyna zî bierj o. Ganî çalakîye zêde bibî û cepheyêko pêrabeste bêro awankerdiş. Ancax bi ruhê Kobanê ma eşkenî faşîzmî têk bîşêrî. Yanî yan do azadî qezenç bikero yan zî do vînî bikero. Ganî ma heme hesabê xo ser rijnayîşê faşîzmî ra bikerî. Ganî ma xo vîra nêkerî ke faşîzm ancax bi xoverdayîşêko radîkal û têkoşîn têk şono. Nika wextê vateyî nê, wextê çalakîyanê radîkalan o.”