Akademîsyene Nurîye Gulmene û mamosta Semîh Ozakça çarçewaya OHALî de bi Qerarnameyê Hukmê Qanûnî (KHK) karê xo ra ameybî îxraçkerdiş û seba ke biagerî karê xo grevê vêşanî daybî destpêkerdiş, grevê înan roja 149. de dewam keno. Nurîye û Semîh demêkê ra pey ameybî tewqîfkerdiş û erşawîyaybî zîndan. Çend rojî verê zî çalakgerî bi derbkerdiş neqlê nêweşxaneyî bîybî û çalakgerî çalakîya xo Nêweşxaneyê Zîndanê Kampusî yê Sîncanî de domnenî.
Çalakî roja 268. de ramenê
Heto bîn ra çalakîyê ke seba piştîdayîşê çalakîya Gulmene û Ozakça Caddeyê Yukselî yê Anqara de yenî kerdiş zî roja xo ya 268. de dewam kenî. Çalakîyî bi siloganê ‘Ma karê xo tepîya wazenî’ yenî kerdiş.
Çalakgerî seba ke vernîya Abîdeya Heqê Merdiman ke polîsan dormeyê ci bi barîyeranê asinan padayî de îzehet bidî çapemenî, ameyî têhet û ewja de yewna rey raştê hêrişê polîsan ameyî. Seba ke polîsan destûr nêda, çalakgerî Ziqaqê Konurî de ameyî têhet û vernîya TOMA û polîsan de silogananê ‘Nurîye û Semîh tena nîyî’ eştî.
Tena wazenî biagerî kar
Çalakgerê ke Caddeyê Yukselî de ameyî têhet û dest bi protestokerdişî kerdî, çalakîya xo de bale antî rewşa Nurîye û Semîhî ser.
ANQARA/ŞÛJIN