BERÎTAN SARYA / ANF / ŞEHBA 


Hêzê Lîwa Şîmal Demokratîkî hêzê sîyasî û leşkerî yo ke şarê Idlibî awan kerdo yo. Endamê nê hêzî heme zî ereb î û serra 2014î de hêrişê çeteyê dewleta tirk ver mecbûr mendbî ke Idlib ra bivejyî û derbazî Efrînî bibî. 

No hêz Efrîn de xo newe ra kom kerd û çarçewaya HSDyî de vera DAIŞ, El Nusra, OSO û dewleta tirkî de şer kerd. Fermandarê Lîwa Şîmal Demokratîkî Ebu Omerî derheqê dagîrkerdişê Tirkîya yê Idlibî de qisey kerd. 

Omerî va ‘Idlib bajarê sifteyînî ke vera rejîmê Sûrîye de vejîyayî ra yew o’ û wina dewam kerd: “Labelê seba ke rejîmî zor şuxilna û çeteyê ke hetê Tirkîya ra ameyênê destekkerdiş ver, zaf ezîyetî dîyî. Verê cû ma bi hawayo bêsîleh çalakîye viraştêne û ma azadî waştêne. Labelê rejîm ma mecbûr verda ke ma sîleh bigîrî û şer bikerî.”


Ma bi fikrê Ocalanî xo rêxistine kenî

Omerî qiseykerdişê xo de bale ant fikirê Rayberê Şarê Kurdî Abdullah Ocalanî ser û wina va: “Ma bi çarçewaya felsefe û paradîgmaya Ocalanî de xo rêxistine kenî. Hedefê Lîwa Şîmal Demokratîkî seke Rayber Abdullah Ocalan zî vano azadbîyayîşê Sûrîye û Rojhelato Mîyanên o. Ma wazenî ke heme Sûrîye destê rejîm û çeteyanê sey DAIŞ, El Nusra û sewbîna ra rizgar bikerî. Heta nika mi qet rayberêko winasî nêdî. Projeyê ci seba şaran î û ameyoxa şarê erebî zî mîyanê projeyanê ey de yo. Ma wazenî çarçewaya fikrê eyî de xo azade bikerî. Cok ra ma komunê xo awan kerdî. Nika 3 komunê ma estî. Ma xebatanê sîyasîyan zî meşnenî. Ma bawer kenî do rojêkî Idlibî azad bikerî û nê sîstemî Idlib de zî awan bikerî.”


‘Tirkîya dewletêka terorîst a’

Omerî derheqê Astana û dagîrkerdişê Tirkîya yê Idlibî de qisey kerd û wina va: “Averşîyayîşê peyênî nîşanê ma danî ke Tirkîya netîceyê pêkerdişê bi Rûsya û Îranî de mîyanê El Nusra de 3 nuqtayê ke vera Efrînî de yî de bica bîya. Herçiqas ke Tirkîya dîyar kena ke aye seba ewleyîya xo kewta Idlib zî, ma hedefo esasî yê Tirkîya zanî. Tirkîya tarîx ra nata hêzêko dagîrker a. Hêzê sey DAIŞ, El Nusra û Ehrar el Şam û sewbîna ke vera şorişî de şer kenî, heme zî hetê Tirkîya ra ameyî destekkerdiş. Nê rêxistinî Tunus ra, Efganistan ra xo bi xo nêameyî. Nê heme bi mabênkarîya rasteyê teyarayan yê Tirkîya erşawîyayî Sûrîye. Tirkîya dewletêka terorîst a û ma do esla destûr nêdî ke Idlib, Efrîn û Şehba dagîr bikera. Ma amade yî vera heme tewir dagîrkerîye de şer bikerî. Wa şarê ma nêzan nêvînî, çimkî şarê ma heme çî zano.”