MEDÎNE MAMEDOGLU JINNEWS/ MÊRDÎN
AKPyijî her ca de vatişê ke cinîyan çinî hesibnenî vanî. Tewr peynî Serekê Pêroyî yê AKPyî Tayyîp Erdoganî vatbî ‘Mare bibirnê, bizewijê, zêde bibê. Ganî muslumanî zêde bibî… Tirkîya de rêxistina terorî no het de zaf hesas a. Tewr kêmî 10-15 domanê înan estî’.
Babete ser o Parlamentera HDPyî ya Şirnexî Aycan Îrmeze qisey kerde û vera nê vatişan de reaksîyon nîşan daye. Îrmeze va ‘dayîke û cinîyê kurdî heta nika şahidîya xeylê zîhnîyetanê faşîstan kerdî’ û wina dewam kerde: “Vatişê peyên yê îqtîdarî nîşan danî ke îqtîdar wazeno cinîyan bikero köle. Nê vatişî hêrişê faşîstî yî. Amancê nê vatişan keye de hepiskerdişê cinîyan o. Se beno wa bibo ma cinîyî do vera nê vatişan de sere nêronenî.”
Îrmeze dewamê qiseykerdişê xo de wina va: “Vatişê Erdoganî vera kurdan de rik û nefretî kûr keno. Verê cû polîtîkaya 3 domanan estbîye, na polîtîka tepişte. Labelê keyeyê seba ke 3 domanî viraştî, poşman bîyî. Çimkî vêşanî û feqîrî zêde bîyî. Nika zî wazenî bi welatperwerîye biresî amancê xo. Cok ra ganî heme cinîyî cewab bidî nê vatişan. Tayyîp Erdogan bi hawayo aşkere suc keno. Polîtîka ‘3 domanan bîyarê’ ewro vejîyayo ‘15 domanan bîyarê’.”
Do têkoşîn bidomîyo
Îrmeze peynîya qiseykerdişê xo de va ‘ma do heta peynî vera nê polîtîkayanê rikinan de têkoşîn bidî’ û wina qedênaye: “Ma do fek têkoşînê xo ra veranêdî. Heta nika hewl dayî asîmîle bikerî û nê hewldayîşê înan nêresa amancê înan. Nê vatişî seba ke cinîyan bi yewbînan bidî qirkerdiş. Nê vatişî verê cû zaf reyan ameyî kerdiş. Labelê ma zanî ke ê do bi nê vatişan nêresî cayêk. Ma tîya de seba cinîyanê Tirkîya û heme dinya têkoşîn danî. Nê vatişê netîceyê zîhnîyetê faşîstî de vejîyenî orte. Ma tarîx ra nata zaf reyan raştê nê hêrişan ameyî. Nê vatişî senî ke verê cû nêbî çareserîye, ewro zî do çareser nêkerî.”