AXÎN TOLHILDAN / RÛBAR OMAR / ANF / DÊRA ZOR
Dimayo ke Dêra Zor ame xelesnayene, hêzanê YPG, YPJ û QSDyî vera hucreyanê nimiteyan ê DAÎŞî de dest bi operasyonanê hemparan kerd. QSDyî mîyanê di rojan de hem xeylê çeteyî tepişti û hem zî cebilxane û tunelê înan dîyî.
Fermandaranê YPJyî ra Ronahî Heleba ke wextêko derg Heleb de şer de mende û nika Dêra Zor de hemleya pakkerdişê DAÎŞî de ca gêna, babete ser o melûmat da. Helebe daye zaneyen ke Hemleya Dêra Zorî seba înan hem zehmet bî û hem zî zaf muhîm bî.
Helebe dîyar kerde ke çeteyan vera înan de şerêko lêmin dayo domnayene û wina va: “Baxoz de hem hetê cebilxaneyan ra û hem zî hetê hîrayîya wareyî ra serdestîya înan estbî. Şerê serranê peyênan de Baxoz de binawanîya xo awan kerdbî. Înan Baxoz de dest pêkerd, labelê ma Baxoz de peynîya estbîyayîşê DAÎŞî yê Rojawanî arde. Hemle hîna nêqedîyaya, zîhnîyetê çeteyan hewna nimite yo, xo sey sivîlan ramojnenê. Mesela herdîşe û porê xo taştê, cilê sivîlî dayê xora, bi nê hawayî plan kenê ke zihnîyetê xo yê leyminî reyna vila bikerê. Wazenê ke hemverê YPG, YPJ û QSD’yî de xo newe ra organize bikerê.”
‘Boya Şarê Baxozî Vejîyaye’
Helebe dewamê qiseykerdişê xo de wina va: “Belkî hîrê ra yewê şarê herême çeteyan dir xebetîyayêne, labelê zulm û zordarîye mecbûr verdabi ke şar înan dir bixebetîyo. Gama ke QSD, YPG û YPJ resayî Baxoz, boya şarî vejîyaye. Hucreyê nimiteyî yê DAÎŞî hîna zî estê. Hemleya Baxozî ra dima ma serkewtişêko pîl fîna dest, labelê ê xo çi mîyanê şarî de binimnê, çi zî teber de, ça benê wa bibê ma do çeteyan bivînê û operasyonanê xo bidomnê. Operasyonê ma bi hawayêkê serkewteyî dewam kenê.”