OZGUR PAKSOY MA/AMED Parlamenterê HDPyî yê Amedî Remzîye Tosune û Musa Farisogullari seba ke beşdarê merasîma cenaze ya HPGyî Mehmet Yakişirî bîyî, derheqê înan de tehqîqat abî. Her ke şono vera abîyayîşê tehqîqatî de reaksîyonî zêde benî. Ma do destûr nêdî Babete ser o Tosune dîyar kerde ke dozgerî nasnameyê 300 cenazeyan tespît kerdî û herinda ke înan teslîmê keyeyanê înan bikero, înan rê tehqîqat akena. Tosune va ‘ame fam kerdene ke AKP do vera parlamenteranê HDPyî de hêrişanê xo bidomno’ û wina domnaye: “Înan nêşîna HDP binê bendê weçînayîşî de biverdî. Nika hewl danî hûmara parlamenteran ya HDPyî kêmî bikerî. Ma do destûr nêdî.” Tosune va ‘ma no bajar de se ra 65 rayan gênî’ û wina dewam kerde: “No şar seba ke ma hetê înan de bibî, rayî dayî ma. Ma ganî dej û kêfweşîya şarî pare bikerî. Se beno wa bibo, ma do hetê şarî de bibî. Polîsî hewl da merasîma cenaze de provokasyon bivejo. Ma veng danî dozgeran; çira nêrakewenî û derheqê ma de tehqîqat akenî? Wezîfeyê dozgeran akerdişê tehqîqatî nîyo, dayîşê cenazeyan o. Herinda ke 300 cenazeyan teslîmê keyeyan bikerî, wextê xo seba ma xerc kenî. Ma îradeya nê şarî yî û ma do hetê keyeyan de bî.”